藝術級的天海Omakase

鴨巴甸街有一間靜岡日籍師傅長澤佳明主理的天婦羅小店天海，低調，只有極少座位，午市要食都睇彩數 。曾經食過午市，天丼好食到不得了，天婦羅炸漿夠薄保持食物鮮味，調味精準，非常精彩。

早前有朋友訂了晚市的Omakase幫我慶生，由於疫情關係店家現時是HK$1,000兩位的極抵價，所以要訂位都非常困難。四月初終於吃了，他們有六點半及八點兩個時段，要準時到達，因為大師傅即場為你炮製，人家每個時段只招呼八個客人，逾時不候。

 

我同朋友當然準時入座，竟然，有客人無出現。先講食物：

 

蝦天婦羅，基本上之前食過一樣高水準，只要少少鹽調味已經好好食；帆立貝，係，超大粒，所以每人半粒，配上松露鹽，鮮甜彈牙，師傅功力深厚先至炸得剛剛好。

有圖為證，刺身級日本帆立貝，油炸時間處理恰到好處。兩道食材出現之後，一對男女姍姍來遲，店員細心解釋，遲左，之前既兩道食材，無得補番。女的向男的埋怨他遲到，呢個時候，男既只可以收口。

 

櫻花蝦餅，配上特製醬汁，毫不油膩，滿口脆香；露筍，來貨新鮮，清甜。

 

左邊呢款叫タラの芽，日本野菜之王，營養豐富，經處理苦澀味後製成天婦羅，從未食過既味道！右邊係平茸，亦係我較少機會食到既菌類，可見炸漿之薄，師傅完全有考量過。

 

蓮藕天婦羅都係半件，加少少鹽係無得頂既！

嘻嘻，炸蝦壽司配海膽，上面放左青芥，紫菜包住，非常之不得了地正！

 

仲有沙甸魚配梅肉天婦羅，用紫菜包住黎炸，高技巧製成品；然後有雞肉包青豆芝士卷，點樣可以炮製得咁平衡又唔會膩架呢？

 

鮎魚天婦羅，實不相瞞，我見到呢類原條炸魚仔有ｄ驚，因為通常魚頭都喪苦，但我呢條食晒，點解架呢？最後仲有清雞湯蕎麥麵，當然湯都飲晒！

係喇，完結係呢個綠茶奶凍。師傅呢，好好人，之前未上雞湯麵，整番兩道菜俾遲到果對情侶，應該可以令到阿女朋友下左道火。

好食，好好食！師傅處理既天婦羅真係當藝術品咁做，而五百蚊（未加一）就食到係非常抵玩，雖然我係有少少唔夠飽既，但絕對推介大家去食！

原來舖頭有分店係北角打平民路線，我都要去食下先。