出色的午餐：仙后餐廳

張敬軒開的法國餐廳仙后早已久仰大名，亦見過朋友吃得開懷大讚，不過我亦知道價錢都非常之可觀。最近，跟舊老細聚聚，第一次光顧仙后，是他們的午市。

我通常到這級數的餐廳前都會到其官網看看餐牌，這次也不例外。我是先到達的，餐廳外的裝修儼如法國的小店，好耐無得飛的我和你，的確可以當自己身在外地。

 

餐廳裝修是果然落本與花心思，難怪有朋友說，未有武肺前，晚市有人唱歌，好情調到不得了。

 

餐單就係檯頭份報紙，我有留意上面真係有日期，即係日日都有一份新，好認真。咁講咁多，講下食物。麵包一出現，先聞到香味，熱辣辣，鬆化綿密，非常可喜。配上椰菜花忌廉湯，原汁原味濃稠度剛好。

 

前菜有幾款，我選既係法式豬肉醬粉紅蒜濃湯配蒜片：

一端上檯，賣相擺盤可人精緻，先試中間的豬肉醬，應該係加入鮮奶打成咁滑，但本身豬既味道仍然濃厚，配上蒜湯，好似食多一道湯羹，但非常出色。至於我舊老細就點左慢煮三文魚加三文魚籽配微辣柚子芫茜沙律汁：

我無試過味，不過食果位就讚不絕口。主菜，我揀左羊：

不得了不得了，呢個係慢煮羊鞍肉，羊肉汁煮珍珠小米配栗子芹菜頭，蕃茜汁。果件慢煮羊鞍肉，落刀一切，力都唔駛用就切到，放入口，噢，點解咁勁煮到果層肥都唔膩又咁入味？你係完全唔可能放過任何一部份！羊肉汁煮小米同樣入味，成個主菜，好食高質又飽肚，你話點算好！

另一主菜係牛！香煎板腱肩肉焦糖洋蔥蕃茜檸檬牛油配薯條！五成熟就當然，我有得試食，噢，以後再黎食Lunch，肯定好掙扎！個扒係非常之不得了！佢收緊你兩舊水two courses ，呢個牛扒係超水準！我同舊老細好熟，佢切開食唔晒我通通消滅埋，薯條肯定唔會令你失望，總之午市呢個扒，牛魔王必點！

我地兩個Shared左個甜品：糖薑鳳梨蛋糕配椰子雪芭，製作與水準同樣一絲不苟，蛋糕一嚐係立即讚嘆不已，椰子我最愛，呢個雪芭係唔夠喉！

總結呢，呢度既午市係非常值得一試，特別你有商務午餐（又或者公司出錢果隻），環境食物都非常高水平。入門試左，有大時大節咪黎晚市享受一下囉。