吃吃的首爾：馬場洞的龍門家

無得飛無得飛無得飛，唯有寫番未寫既。去年出差去首爾，越來越識食好西，再加上有當地朋友帶路，更加唔會中地雷。

極愛牛既我，早於第一次到寵寵寵已經見識，韓牛又好食又抵食。於是，趁住有當地朋友同行，出發往食韓牛熱點馬場洞，一間應該好多遊客非常熟既龍門家。

由於本人出差咁就當然的來的往，咁據知搭地鐵去馬場洞站係可以到達既。咁，果邊其實係賣韓牛既肉食市場，同時亦有一條佈滿食肆既巷子，龍門家好易認，因為一定有老奶奶個嘜頭。

 

我當日就上二樓既，店舖裝修非常地道，而且多數都係要除鞋坐低果隻座位，女士自己注意喇！

  

  

小菜當然豐富啦！今次又再一次發現，我認識既韓國同事同朋友，佢地原來麻麻地鍾意食生食物，所以，小弟必點既生牛肉拌水梨，本人獨享！

 

你知道嘛？就算係韓國食呢個，越地道既餐廳越好食，因為牛肉唔會未溶雪切條端上，一定係室溫好鮮甜！呢個，唔貴之餘，牛肉鮮甜多汁，水梨清甜，我要完成佢，無難度。

 

 

我地點呢個韓牛拼盤陣容非常鼎盛，餐牌有介紹係包括乜部位既但我真係無影低，總之，炭火燒烤，換盤換烤網速度好快，而韓牛質素係每件都食到我嘩嘩聲，真係超級好食又抵食！

呢個牛肉刺身係老闆娘送既，咁，又係我食晒啦，輕沾麻油醬料，又或者鹽巴，啊！太好食喇！

朋友話，加多個冷麵就岩岩好喇！佢當然處理埋啦，果然無介紹錯，酸酸地，解油膩！

我已經同自己講，以後出差一定有一晚要黎食過！太歡樂喇！