生日在台北：再來千一元台幣的Omakase

生日要對自己好一點，本來想約另一位同事吃這一家，不過同事不吃生的食物，所以後來跟他吃了另外一頓好的。那麼，我難得要來過生日，當然自己都要好好吃，所以，就在面書訂個位，星期日最早的十一點半場。

是的，我已經介紹過，這次也不會開名，其實都不是什麼秘密，上次都有朋友自己找到了。大安區，日本無菜單料理，千一元加一就可以，這樣都找不到，幫你唔到。

由於都是一人來所以又又又被安排在最角落的孤獨位，不打緊的，我唯一的目的是來食好西的。你以為星期日早場唔爆咩？爆，不過真係遲到者眾囉。

 

（他們的漬物很好吃的哈哈）首先出現的，是沖繩海藻配鰻魚苗。沖繩海藻微酸我當然食過，鰻魚苗未食過，似白飯魚仔但顏色較白。

 

然後係台灣野生鮑魚，鮮甜有咬口，厚肉彈牙，配少許青芥就更提味了！

 

白魽魚刺身，已經輕輕調味，一放入口就知新鮮！

 

然後有三重縣紅魽壽司，很有水準，一口滿足。

安鱇魚肝，煮得剛好而入味，味道又沒有蓋過本身的鮮味。

 

蟹膏魚肝茶碗蒸！蛋香又滑，配上蟹膏又不會膩，精彩的配搭啊！

 

炸北海道帶子！剛剛炸口用脆脆紫菜包住就送上，熱辣辣，帶子炸漿薄薄但帶子厚肉又甜，真係好想食多粒啊！

 

然後有紅喉壽司！

驚喜又點會咁少！師傅然後端上，南非生蠔，已配上醋汁，雖蠔味不算濃（記住，只係千一台幣咋老細），但質感味道都非常好！

 

呵呵，仲有中拖羅壽司，真係無筋又有充足油脂，食到呵呵聲！

接住係富山縣螢光蟲魷魚軍艦，比較少食到呢款，唔錯架！

仲有北海道馬糞海膽飯呀，係呀，一口份量，回味無窮架！

然後仲有和牛壽司，即場睇住師傅用火槍輕炙再包入醋飯塗上醬油，又係好好好好好想啪多兩件！你唔食牛咩？無問題，整多個拖羅手卷俾你！

 

未完未完未完！壓軸出場（其實中場師傅囉過俾我地影相）來自菲律賓烤龍蝦，每人半隻！份量十足，烤得火喉剛好，啖啖肉，無得彈呀！

 

臨尾仲有珍菇味噌湯與及甜品！

 

我決定每次來台北都食一次，當然出發前乖乖訂位啦！再提大家，店家本身係要求交訂金訂位既，咁我香港人一條友佢就同我講個信字。所以，若果你未能成功訂位，唔好話人，你搵辦法叫台灣朋友幫你喇！