逃到歐洲去的Wonderwall Coffee

早陣子又到澳門去，當然順道找來澳門在地的契老豆吃個飯。由於很即興，而且時間有限，契老豆帶我到一條舖滿小石的路，沿著這條石仔路走進去，到達一家小咖啡室，名字叫Wonderwall Coffee。

這小店是契老豆的朋友所開的，位於荷蘭園石仔路，踏進餐廳就先聞到咖啡香——是很獨特的咖啡香，或者因為店近門口就是水吧及煮食的位置，當然還有那一個放了齋望就好想食的蛋糕，然後再行入去，用餐的地方，非常Cozy，天花掛了乾花，一邊放了兩張梳化，其餘的檯不會排得很密，所以，我眼見食客們都很自在地用餐，喝咖啡，或者看書。我絕對承認這店的確非常適合文青，或者像我呢類為食偽文青來打卡。

 

 

講到明我為食，所以就算我坐下好像到了歐洲小巷的咖啡室也好，也要食物好吃啊！

我點了呢個忌廉雞肉珍珠菇意粉，首先，我好喜歡意粉煮得剛剛好，正宗的意大利粉應該有適當的咬口而不是軟身的，而就算此意粉看來醬汁不多，實質是，那個好rich好creamy的忌廉汁剛剛好包在大部份意大利粉上，珍珠菇與雞肉塊都煮得剛好，滑而鮮甜，而且沒有過份調味，這個意大利粉看來普普通通，因為細節都做得好，非常高分。

契老豆點左秘製牛腩飯，上檯望落平平無奇，我食左件牛腩，啊！鬆化而且牛味濃，應該用牛肋條煮，那個秘製汁好好味，我最初以為紅酒煮，後來問問老闆，錯！原來係啤酒！呢個牛腩飯我係非常之念念不忘，下次我應該會變心食牛腩飯！

契老豆幫我發辦揀咖啡，此杯叫「奶奶咖啡」，無記錯係老闆媽媽每朝炮製俾老公既咖啡，乃用不同咖啡豆配成。我本身係齋啡人，所以先飲啖黑啡，啊！好複雜！先來是苦味，然後慢慢回甘，絕不簡單！然後契老豆叫我加奶再飲，啊！又是另一回事，順滑易入口，契老豆無介紹錯！

點解叫奶奶咖啡？咁老闆媽媽咪係老闆娘奶奶囉。

蛋糕賣相太吸引，所以就算時間比較趕都點都要食！呢件係Oreo千層蛋糕，好食啊！唔會死甜，而且鬆化軟滑，望都望到真係好多層，所以的確花功夫並無偷工減料！

契老豆話佢食過而最愛係呢個窩夫，我就無偷食到，賣相好靚仔係咪？

後來老闆話我知，此小店每逢星期二有music free jam session，有玩音樂朋友在場Jam一下，而我無記錯此店有賣酒，所以應該係有happy hour。若果下次去澳門，不妨光顧此店，感覺好良好。

仲有亮點：當日見阿老闆實在非常高大靚仔（我又搵到條澳門葡語電視台訪問而真人係好睇過條片既），契老豆話，老闆娘亦非常之省鏡（我就遇唔到既），你知啦，地方舒服，食物好，若果老闆都高顏值，係咪成件事非常完美先？