再次入住Portman Ritz Carlton，無他，因為跟工作地點夠近，而且又可以住得舒服一點，享用酒店的Club Lounge，幾時番到去都可以上去飲飲食食。至於酒店附近，我問過同事們，他們介紹了兩家餐廳給我：品川及南伶酒家。
我是樂於聽本地人的意見去試一些沒吃過的餐廳，先介紹
品川，是吃四川菜的，的確開正我果瓣，而且方便一個人食，份量不多，餐廳裝修摩登。
我光顧的是恆隆店，是星期日晚上，餐廳沒有坐滿，而員工是幾好笑的：大大聲談天，好似唔係好當我係度食緊野。唔緊要，食物的確幾唔錯：
首先這叫品川老壇子，是用紅椒與泡椒醃的冷盤前菜，當中除了鳳爪還有豬耳，入味夠辣，越食越辣果隻，好爽：
還有涼拌關東木耳，點解係關東我唔知，不過我非常愛吃呢款酸酸辣辣既木耳，仲配有腐竹，越食越開胃：
一品酸辣湯，通常有酸辣湯我都會試，這家做得精緻，味道到位，我最不喜歡那種味道不酸不辣或者一味酸辣的，這個味道合格，料亦多還有鮮蝦：
我很愛點了這一道叫青花椒汆牛舌，用上青花椒青線椒製成湯汁，再將切得非常薄輕輕出水的牛舌放進去煮，望落好辣，實質不是，是惹味越食越想食，好過癮！
還有這碗成都酸辣粉，越食越爽一邊標汗一邊叫爽，湯汁幾勁，但好味！
不過若果推介呢，我會推介位於嘉里中心南座既南伶酒家，我於星期三晚八點半到達，非常多人，好彩岩岩有一檯孤獨檯吉出我先可以入座。南伶酒家食乜呢？賣的是揚州菜，我食完先知，蔡瀾先生大讚此店，堅持老上海菜的濃油赤醬。
裝修高級，不過放心，菜式價錢都幾親民，所以放心食啦！
我原本應該點蝦籽茭白但黎左呢碟油燘筊白，太肚餓所以照食，呵呵，知唔知乜叫濃油赤醬？應該係調味偏濃，但神奇地依然食到筊白既鮮甜，越簡單菜式帶來的驚喜越多。
蟹粉干絲是一人前，乃用雞湯煨豆干絲，再加上份量不少的蟹粉，整件事就係，湯雞好清甜，干絲又吸盡雞湯，配上啖啖蟹粉，滿足度爆標！
我另外點左個燉湯，呢個叫枸杞竹笙土雞湯，鮮甜無添加，六十八蚊人仔係值既！
此店之水煮牛好可喜：牛肉夠多夠嫩有鮮味，湯汁麻辣夠料，裡而還有高麗菜與及金菇，送飯一流！何況我唔係送飯，我叫左呢個：
上海豬油菜飯，非常不健康（所以肯定好食），係呀，油膩，但豬油極香，菜飯當中仲有咸肉粒，齋隊呢個都夠高興啦！何況撈埋水煮牛個汁！
呢餐，連埋杯鮮榨西瓜汁三百四人仔，真係好食，而且餐廳雖然位處高檔區裝修亦幾高檔，但食客食得好開懷絕拘謹，有幾會搵幾個朋友一齊食，一定好開心，最重要係我今次黎到有疑似必點既蔥油雞已經賣晒，餐牌上有好多好吸引既，唔叫多人點食多Ｄ呀！
沒有留言:
發佈留言