話說我與朋友們都好愛吃辣，於是飯局地點十次著八次食辣，仲通常係麻辣呀火鍋呀川菜咁。前前前陣子再去三希樓，當然唔差，不過價錢亦唔差，位置就好差。與老細傾開食，佢介紹位於九龍城晉萬川味坊，簡單黎講，就係平靚正，又辣又香。
幾個月前拉大隊十幾人去食，相識十幾廿年蝗蟲部隊通通歸位，所點菜式點完再點成足幾粒鐘成檯都係都兩舊幾水Per head，由於戰況如此激烈我當然唔會為左你地影相而放棄自己食好西既機會啦！好快，我地又encore，今次人少左，所以可以好好紀錄一下再介紹。
唔知係咪因為上次太與奮，今次我地被安排上閣樓房中自成一角，無min charge仲有電視睇，仲好，大家食得更盡興！先黎介紹幾碟前菜：
麻辣拍青瓜，重點係乜？首先出水出得好，麻辣之餘青瓜爽脆清甜囉。
我至愛既木耳！其實個基本辣汁好味又醃得夠時間，點會唔好食丫！
夫妻肺片，除左辣，仲有久不久中招既花椒，本身食物亦滷得好入味，所以，有白飯真係爬幾碗。
麻辣柏葉，我好愛牛柏葉，呢個當然無得輸啦！
由於今次要照顧小朋友既口味，我地都點左幾味唔辣既：
上湯餃子，我無食過既，湯有飲過，奶白色好鮮甜，餃子目測皮薄又飽滿，小朋友食得幾高興。
呢個招牌炒飯（定係我記錯名），在場老饕表示，炒得好唔錯，乾身不油膩有鑊氣，小朋友當然喜歡，仲有咁大隻既蝦球。
牛油松子炒粟米，以為平平無奇，小朋友係咁食仲要我地唔好食晒，我一試就明白，牛油味香濃，粟米炒得不乾身，難怪小朋友係咁食，大朋友又係咁食。
粉絲雜菜煲與及蒸水蛋，勝在不花巧勝在味道夠家常無乜味精。
喇由於我地同餐廳講，攪掂小朋友先，所以佢地上完幾個前菜就係咁上唔辣既，辣度好似越之後上既越勁，好重要，因為小朋友食得膠興，大人之後先可以盡情食。
呢個少少辣既蒿筍臘肉，一定要食：呢隻川式臘肉充滿咸香，蒿筍果隻甜味本人一向好喜愛，廚房師傅炒功了得！
椒鹽鴛鴦豆腐，有豆腐與玉子豆腐，好食在香辣（唔算好辣，小朋友都食到）豆腐仲要保持嫩滑！
酸辣土豆絲，應該係香港食過數一數二好食！酸味辣味咸味平衡，土豆絲軟硬適中又入味而且夠乾身，我好愛酸辣土豆絲，俾好高分。
黎喇黎喇：首先係水煮牛肉，上次應該食左水煮魚，今次牛肉嫩滑但可以再入味，這個汁係好高質（係可以隔渣撈飯），入面仲有芽菜薯粉，停不了！
爆炒肥腸，愛食大腸既朋友不能錯過，香口到不得了，送酒一流！
毛血旺,鴨血餐肉牛柏葉牛肉仲有其他野，呢個好入味架！
螞蟻上樹，上次食過念念不忘，今次再叫都係咁好食。
最好點多兩道菜，清一清，娃娃菜都係咁啦，清炒蒿筍不得了。
我地飲左兩枝啤酒好多好多汽水，埋單，位位唔駛兩舊，好滿意。我地得知佢地有間姊妹打邊爐，下次決定試埋呢樣！
沒有留言:
發佈留言