多倫多食得多：茶餐廳粥粉麵

大家知我愛吃所以呢，一知我去多倫多，自然有人提議食呢間食果間，當中係包括茶餐廳中菜與及粥粉麵。我絕不抗拒，因為我相信美加有好師傅，質素應該有驚喜。

首先介紹番一個大家平日都可能會食既早餐，餐廳個名叫澳門街，我睇餐牌個Varieties多得誇張，同學表示水準不俗。

上方係同學既早餐：我有試過果個羅宋湯通粉，普通啦，個羅宋湯一般無驚喜。不過其實大家應該見，就係我同佢果兩碟配上既，係密瓜與哈密瓜！喂堅甜堅好食，香港睇怕好難囉。

煙肉量多，雖然炸過籠但香脆好食，亦唔係低價貨色；太陽蛋微微燶邊，好唔錯。

沙嗲牛米，首先無乜味精感覺先，沙嗲牛似樣牛肉唔會無牛味，份量又大碗。

最驚喜應該係呢個奶茶：我無諗過質素拍得住香港，你知啦，好多人番香港就要飲奶茶，但多倫多呢杯絕不失禮。

然後呢，某晚，同學問我想食乜，我話喂不如食粥啦（因為兩個鐘前先隊完碗牛河）。於是，呢間就勁喇！粥麵燒味小炒煲仔飯都有，而且大間仲坐爆！

天皇名粥Congee Wong，呢張相係話你知，佢真係成大篇野講粥既歷史！

無錯，薑蔥撈麵！首先真係好好好大碟！其次，麵無乜鹼水味，湯係靚同好飲（即係細細個去食撈麵有靚上湯果隻啦），咁鬼多蔥同薑絲，無得頂呀！

皮蛋咸蛋瘦肉粥，喇，係喪大碗！然後你地見喇，咸蛋粒煮左入粥，個粥綿到無野好講，無味精，皮蛋又多，仲有好多咸瘦肉！你要明白，就算咁大碗，大約香港三四十蚊，但係超值架播！

一邊食，因為飽啦，睇見隔離左右好多野想食，真係好多好多野想食！若果有機會黎多倫多，不妨食下呢間。

最後呢就送上多倫多據聞人人都識去Diana's，目的只有一個：買海鮮！

無錯，都係生蠔與海膽（仲有Ｎ種味既Tabasaco）。買左番去，同學好好呀，開蠔我食：

蠔，唔記得邊隻打邊隻，好鮮，連海水都隊埋；至於海膽，有樣你睇，我叫同學咪咁麻煩用多士食，學我咁啪一粒先講啦！無架，佢咪好似我個反應咁，欲仙欲死囉。