紐約又一天：Benoit New York

經過兩天沒有一秒鐘可以hae的會議，五點完會，六點半晚飯，外國同事們（我指英美法國應該無乜被時差影響）先去Happy Hour，我表示要番酒店抖一抖，我是講真的，真係番去訓一訓，就算半粒鐘都好。

是次所選的餐廳是Benoit New York，根據官網介紹是Contemporary French Bistro，本人真係識鬼咩我又唔係食家，不過實在這次好喜歡此餐廳，典解呢？

我們被帶往餐廳後的升降機，上到二樓，原來有一間非常有格調有私隱的貴賓廳（人地叫L'Officine），好靚好靚：

在大家飲兩杯之後，坐定定，選好菜，就開始食喇：

龍蝦沙律，喜歡是因為沒有鬼五馬六，而且龍蝦非常鮮甜，配上中間的小米，與及旁邊的薄荷醬汁青瓜絲，賣相漂亮，食得開心開胃，份量又夠——本人好怕three courses meal食完肚餓,，因為好靚但好細份（又唔係特別好食果隻）。

BTW，呢碟單叫的話US$32

主菜，我揀牛啦：New York Strip Steak配薯條，仲有另上荷蘭汁。首先薯條係好好好好食：脆，香，有薯味，所以旁邊點左魚既同事，我叫佢食啦唔好客氣，因為佢食過之後停唔到手；牛扒，終於終於終於我係New York食到靚扒喇！Medium Rare就係Medium Rare，鬆化而當中肉汁剛剛鎖住，完成呢一件牛扒真係飽。單叫US$44。

甜品黎架，叫Our Baba: Armagnac & Whipped Cream，上檯後淋上干邑汁，兩件蛋糕吸收干邑之後非常堅，中間個Cream好好食，好勁，我之前飲左香檳紅酒再加呢個，理應真係喪眼訓，番到酒店真係即訓，但，三點幾醒。

無，想話個咖啡杯真係好鬼靚之嘛。

好喇之後就介紹人生第一次去多倫多四天喇。