大陣仗的燒海鮮：漁獲浜燒

原來飛得太多然後主力寫外地食過乜的結果，就是將好多餐本地餐廳忘記報導！好彩，我都有乖乖將照片放上網上相簿又有寫低餐廳名，先可以將應該介紹的餐廳寫一寫。

此餐廳名叫漁獲浜燒，位於銅鑼灣成幢好多間日本餐廳既澳門逸園大廈，而當晚就有朋友請食飯，開飯時間，應該係去年十一月既事。此餐廳主打乜？燒海鮮，即場係你面前幫你燒果隻。

首先出現係兩碟小食：雞泡魚干與及燒鰻魚，預計水準，可以的，特別係呢個燒鰻魚，肥美得來火喉亦剛剛好。

當晚亦有食刺身，應該係逐款點既，而侍應亦有推介當日有乜好介紹咁。雖然此店唔係主打刺身，質素不錯既，特別係秋刀，加上特製酸汁，好開胃！

另外有一個好邪惡既小食：蟹膏多士，朋友話一定要點喎：

好食但真係少吃為妙。好喇，是晚重點：特盛漁獲浜燒盛合二人前，HK$688，真係抵玩：

珍寶大蝦一隻，松葉蟹腳，鮑魚兩隻，蠔兩隻，帆立貝兩隻。質素如何呢？

　

真係唔錯，樣樣新鮮，特別呢個蠔，鮑魚帆立貝亦好唔錯！

因為唔夠喉，於是點多個和牛Shabu Shabu：

無記錯唔貴，而和牛大家有眼見，油花幾豐富架！

最後貪得意點左呢個蕃薯雪糕：

實在係，份量細，又唔係特別好味，中伏。

總結，此店的確食燒海鮮水準不俗，而且價錢都幾合理，想久唔久豪一次，可以考慮此店。