食在上海：成隆行全蟹宴

又由於遊客呢無本地電話所以呢要訂檯食飯必定要假手於人，而因為剛好有香港同事在同時段出差上海，於是，有兩餐飯可以不用單頭晚餐喇，而其中一餐，就為配合呢位極愛大閘蟹既同事，到成隆行食全蟹宴。

其實我有成份餐單，不過咁介紹唔好玩：喇以下全部每個人三八八人仔（唔包飲品唔駛加一），你地睇睇值唔值：

先來冷菜三品：水晶肴肉，芝麻醬沙律菜，麻辣海蜇頭：

爽口好食咁啦！

蟹肉翅，唔係講笑，有蟹膏仲要個翅真係足料，得！

蟹柳露筍，蟹柳真係蟹腳肉，露筍爽脆。

蟹粉豆腐！豆腐嫩滑蟹粉絕對唔同你計較，啖啖都不能放過！

大閘蟹每人一隻，我懶，又唔係特別愛大閘蟹，俾晒同事食，睇佢拆出黎同時根據佢既經驗，佢話細隻但好好食。

蟹粉小籠包，咁我今次就有兩隻喇，得架喇總之呢加入陳醋將入面既湯汁與蟹粉一滴不漏隊晒，實在係爽歪歪！

高潮迭起呀！蟹粉撈飯，竹筒飯特別香口，配上花生呀芹菜呀蝦米醃菜粒等等，好難唔食晒架真係！

蟹肉時蔬，原諒我真係唔記得係乜野菜，總之唔係豆苗，好似係菜芯！

甜品係雪梨薑茶，仲有水果食！你話喇，呢個餐係咪抵先！

餐廳古色古香仲有人現場奏樂，影相呃Like亦得！我就好滿意喇，你地去開上海可以考慮一下。