首爾寵寵寵：住與買

是次公司安排入住Westin Chosun Hotel，行過明洞唔駛五分鐘，行番公司就十五分鐘——當我第一晚探路知道點樣係地下街行番去唔駛過馬路，不過我坦承之後兩晚行番酒店都要兜路，因為迷失地下街。

咁呢間酒店點呢？位置便利房間夠大係望出去個View麻麻，不過其實整體唔錯，我填意見書都讚，除左一樣野。

望出去係點？

係呀可以睇到繁忙既交通咁囉。

房夠大間張床亦夠大我最欣賞床褥好舒服所以呢幾晚訓得非常好。

洗手間用品齊全而且擺得好靚，而且Housekeeping既阿朱媽有禮貌親切而且英文了得，問題係邊呢？我無諗過韓國高級酒店沐浴露之類竟然唔係made in Korea而係made in Malaysia，而剃鬚膏竟然係made in China！韓國呢類用品大把選擇，點解要咁揀呢？我都反映左，唔係投訴，而係相信咁樣能夠令提昇酒店本土特色咁囉。

呢次出入都係搭的士，由於韓國朋友英文真係水準一般，所以我要去邊最好都係搵定個韓文地址然後麻煩酒店職員講俾司機知，而我亦做過測試：究竟我俾英文地址酒店職員叫佢話俾司機聽去邊容唔容易呢？結果係我見佢地都搵好耐。另外真係要讚的士司機收信用卡，方便之餘又可以儲積分！

另外，韓國用Google Map係唔多方便，因為好多地方搵唔到，亦唔會提供步行／行車路線，據聞與國安法有關但未經證實，所以要用Naver Map，不過英文就唔多行得通，呢方面都幾麻煩。

最後想講購物：我無乜時間行街，只係麻煩同事話我知附近有冇唱片店，終於俾我係明洞唱片店買到呢隻，全店最後一隻：

另外問同事邊度超市最好行，佢地建議我去首爾車站樂天超市，果然好精彩，亦遇上唔少香港人。要提幾件事：買滿三萬won係可以即時退稅，另外找數時提供膠袋與紙袋給予非本地人係收錢，俾本地人用既膠袋又係另一種，好似平少少。我呢就建議唔好見到所有野失去理智，計計數係咪真係平，有貨品其實香港都有（例如759）除非好抵先好搬番黎。我就有口話人亦有計數結果埋單果陣係咁：

最最最後：韓國流行用Kakao Talk多過Line好多，所以Line store多數係外國人行，而位於江南區既Kakao Flagship store，係好多野睇好多野買仲有cafe，仲有，好，多，人。

佢係ryan，係主角，咁岩都係熊。

我真係有打算買野但實在太多太多人喇所以放棄，或者下次啦。下次我會搵機會行下架喇。