搵食嗟犯法呀

話說最近有人在網上告知，位於第三街與水街交界的新記老細即將榮休。由於有人指星期一是最後營業日，於是，香港人那種突然懷舊情懷唔追憶就蝕的心態又來了，排晒隊。雖然後來有人表示老細話，業主未話幾時收，做得一日得一日，結果日日都有人排隊——今晚六點幾行經，排到上樓梯；食完飯八點行經，繼續排到上樓梯。

好，究竟新記賣乜？魚蛋呀煎釀三寶之類既小食啦。歷史的確悠久，我讀書時期已經存在，咁你會問：好好食架咩？我就久不久行過都有買佢既煎釀三寶，質素可以，重點係，抵食！點抵法？今年先加價至六蚊五件，之前幾年都係一蚊一件，香港依家呢個價錢，唔多見。

不過，我都有試過有一兩期拒絕幫襯，典解呢？

討論區有人指，此店於去年區議會選舉及今年立法會選舉，面向第三街那幅大約米半闊三米高既外牆，貼滿禮義廉候選人海報。於是有人就話：咁既小店都幫襯，你班香港人真係無得救喇。

我的確就係於此店貼出禮義廉海報期間無幫襯，原因係眼冤，行過都覺得嘔。雖然我明白，一間小店若果有人搵你賣廣告，有錢落袋，唔通唔賺？你估賣煎釀三寶好好賺咩？

點解我有諗過係俾錢賣廣告？因為立會選舉結束翌日，所有國軍琼子海報立即被消失，咁大家都明啦，好多舖會由佢貼架嘛，若果係真心支持的話。

打開門做生意，顧客有千百萬個理由選擇光顧與否，當然，包括政治取態。每人都有一把尺，有人會覺得你用任何方式支持果班野都係錯架喇。可以的，無錯的。

骨氣這回事很珍貴罕有亦值錢，做生意要交租，有時有錢真係唔賺？於是，我果把尺就係，你一日貼住我一日唔食你。誠然，你覺得你願意貼出黎，唔理你係真支持定係賣廣告，都唔原諒，Fine，無對錯的。

咁有邊隻我係一定唔會幫襯？例子好易俾到你，炒蟹果間，兩年前佢老闆做過乜，都唔駛我點介紹喇。

不過最後我都覺得：點解香港人咁得意要走黎排隊買煎釀三寶呢？係真係覺得好食，定係人地話你知佢就執所以要食，定係唔食唔自拍一野對唔住自己咁呢？

老老實實，我唔覺此店出品要排隊食囉，仲要幾十人排果隻，時間好多咩下？