首爾寵寵寵：同事午膳（下）

其實回顧此次旅程，或者因為並非太在狀態，所以下次應該可以有更好安排，起碼唔會好似餐餐都差唔多嘛！今次除左介紹兩餐午餐，仲有未寫既都貼埋。

首先係位於附近문래역 2호선，我已經好努力嘗試搵番餐廳名同位置但都唔成功，咁惟有介紹下食過乜啦。

呢餐都係韓國菜，不過當中都有未食過與及唔多識既野：

唔該有朋友幫我搵番間餐應位置與名稱，唔識打韓文呀。（轉頭就有朋友係面書話我知餐廳名叫오백채마을）

同事問我食唔食bulgogi話係牛，咁我又唔知係乜就用佢地叫，原來係咁樣上既烤牛肉混入大量芽菜！通常食法都係加泡菜加辣醬用紫蘇葉包住，同事好奇點解我會食得慣紫蘇葉，其實我好鍾意紫蘇葉隻香味（食日本菜我會食埋果塊葉），當然無問題啦！

呢碟係佢地食得好開心又叫我食既辣魷魚，其實我覺得有幾款韓國菜玩法都好類近，問題放左乜野材料作主菜。辣，但我食到，亦好好味。

辣牛肉麵囉，入面又有蝦米呀泡菜咁，都！係！辣！

另一日，出巡江南區，決定去Food court。呢個Food court位於Galleria Department Store West商場地庫，食物選擇多，但最impressed係，佢地會叫食客排好隊然後安排你坐，你點完菜放低個Sensor有人送黎俾你，Food Court播，或者因為呢處來既人實在富貴——憑我目測與及問同事得知。

佢地成日叫我試韓國點心，話韓國點心好大件，我的確見到係大件過中式點心。呢個包入面係豬肉，辣辣地既。

我同佢地提過，呢兩樣我睇韓劇成日見人食。於是佢地今次就點俾我食喇！韓國既辣炒年糕係好好食：首先味道調得好好，偏辣帶甜，醬唔會太稀，而最重要係年糕有米香仲要好煙韌！至於魚糕，無乜特別，個湯好甜。

本人揀左韓式冷麵做主菜，同事事先警告：好辣架播！我話放心啦！首先佢真係上菜時附上好大把鉸剪，你唔剪幾野係會食得好唔方便；辣？唔會，我覺得好好味，透心涼添！韓國人飲食養生之道係熱就食熱野凍就食凍野，所以我係選擇正確架！

同場加映呢個韓國牛奶雪糕，嘩牛奶味Rich到不得了，三十蚊港紙左右啦。

我某晚走左去食炸雞，呢間叫Kkanbu Chicken係連鎖式四圍都有，我亦見韓國人放工走去Happy Hours，不過似乎我就點錯野食喇。

我無諗過蒜味炸雞係咁：好似烤雞再隊一球蒜蓉俾你，咁雞本身當然無乜蒜味啦！中伏之作。

另外點左呢個佢地話係招牌既辣味螺肉意粉沙律，凍食，咁你係咁撈撈撈。首先真係多螺肉到飛起，問題係，一味得個辣字，呢個組合並不是我杯茶囉。

臨走前午餐，光顧呢間叫Arirang，老字號餐廳。臨走喇，當然，又係食生牛肉啦，不過今次係食bibimbap，即係，生牛肉拌飯！

雖然生牛肉唔多，但材料樣樣新鮮，撈埋食果然好好食，而且養生——你睇有幾多菜！不過此店既牛肉湯就比較失色，淡淡的。

最後一篇會介紹下酒店。