重遇曼谷：買買買

我與曼谷的相遇比較遲：應該是大約六年前因工作才第一次去，然後很很很喜歡，因為好好食錢好好駛。六年後再去，同樣因為工作，而這次留了六天，當中四天是工作，剩下來的時間就自行處理。

七月的曼谷，很熱，而且失驚無神下很大雨。曼谷繼續塞車，當地同事告訴我曼谷成功成為全球塞車最嚴重的國家。我知肯定坐地鐵或者Sky Train比較快，不過天氣差而且太累不想行，於是常常Uber——不知是不是因為太塞車，所以這裡取消Order沒有收費。言歸正傳，這篇是想介紹一下，雖然沒有太多時間逛，我還是買了些東西回來。


這次大部份時間都住Centara Grand，即Central World樓上，所以，要去Big C非常方便。記得幾年前也有到那邊走走，總有些東西係幾抵買的。

泰國版，Big C買110Baht一盒十包（喂自己兌番港紙啦，除4.4-4.5左右），另一包係Asiatique買，竟然仲平！100咋！呢類當然係小朋友至喜歡既手信啦！

呢樣就係香港果隻搽左個人精神番既類似驅風油物體，一枝先係29Baht！仲唔入貨咩！

呢隻用黎通鼻塞既，六枝裝125Baht！

見到咁平忍唔住買左咁多枝不過屋企人都用：因為竟然有Ocean Fresh同Cool Pink唔同味道，最右手邊果隻仲有極度清涼配方，每兩枝只係99Baht！

最後一天早上無論如何也要去Chatuchak！由於時間不多，而且熱到反艇，我抱住是但行見到岩講少少價就買。咁，行左應該個幾鐘已經要忍痛離開喇：

呢檔原本我係Line同佢聯絡左想訂兩個名既，點知佢突然話我知間廠做唔切！唔緊要啦都去望下，於是買左呢兩個番黎，加埋620baht。

 

同上次一樣都去呢間叫Corsair手製皮拖買鞋，首先想講佢地既尺碼好無定向風，真係當場試先知，而點解再買呢？因為抵囉，呢兩對加埋1,800baht，同上次一樣，即場換一對先入去行啦。

咁岩行過見到呢批message tee已經話俾自己知要買！結果500baht三件，係咪好歡喜呢！舖頭係sec.2入面，咁除左呢幾件仲有星期一至日啦，tonight等等好幾款，咁我真係覺得我呢三件至開心囉。

呢類袋應該唔止一檔有得賣，原本我睇中另一個不過我真係唔鍾意拉鏈。點抵玩法？一個100baht！香港賣俾你可能兩舊啦下話。

咁除左以上之外，我早一日都去左曼谷先達MBK，有以下收獲：

韓國製叉電線仲要好長果隻最重要係抵玩100Baht一條，即刻番酒店試過係用到既。

左手邊木紋呢個連埋貼玻璃貼都只係300Baht，右邊呢個其實係於TFest期間限定市集買，每個手製而最吸引我係隻物料有降溫作用，咁我見呢個雲石紋咁正，個電話都涼D啦！俾埋佢地資料你，呢個貴但值得支持，350Baht。

最後呢，就係買左個匣。話說咁既，我同當地同事提過或者想買匣，咁Central World既Zen其實都做緊Sales，點知原來岩岩開始Bonjour France，星期五開始係地下擺左好多法國品牌Counters，同事即刻Line我話Delsey呢隻匣減到最多三折！於是最後一日殺左去，買左以下呢個大匣，4995baht。

咁，其實我本來帶左個大匣過黎諗住買野有匣裝，家陣多左個大匣，諗住實過磅啦！正當打算用Asia Miles解決之時，地勤靚女空姐話：其實你有23kg，依家30咋播，你執走少少野啦！於是我真係係咁易執走少少，27kg，佢就俾我過喇！你話幾高興呢！

好，之後慢慢寫食，食左好好好好多野呀喂。