2016星洲出差：食盡東南亞（上）

我應該不只一次提過，星加坡，吸引我的只有食，原因是他們的餐廳無論低中高價總不會太離譜，而且選擇都很多。所以，出差的話，都希望盡量選擇食得開心一點。特別是晚上，這幾天都有親朋帶路，有好幾家餐廳實在要重點介紹。

那麼，午餐時份，就算沒有時間找好吃的，總有些不錯的選擇——特別是公司就在主要遊客區。都很不錯，才介紹吧！

首晚到達都有點夜，舊同事就帶我去大食代——係，其實大食代來自星加坡。老實對於香港的大食代感覺不錯，不過心想他帶得我來，應該不會叫我吃些是但野。他沒有問我想吃什麼，只問我可以吃多辣，辣？我無問題。原來，這家叫檳城老街坊，來自檳城的他，表示這家的確很正宗：

這是很正宗的亞參叻沙，首先，粿條較粗身，而且幾辣，入面魚肉碎之外好多其他料，菠蘿呀蔥頭呀黃瓜洋蔥等等，仲有蝦膏與及羅望子汁調味，酸酸辣辣，非常開胃！

大蝦福建炒麵，首先蝦球出奇地彈牙，而此福建炒麵，用唔少老抽，好味道，唔算太肥膩，不過我更愛，係海鮮炒河粉：

先用醬油膏炒過河粉再淋上有蝦，帶子，魚片，豬肉既玻璃芡，喂呢個真係好得，我係咁食係咁食。

非常邪惡檳城鹵肉拼盤，其實係炸物大雜會！豆腐，豬肉卷，蝦卷，蝦片，魚肉卷，樣樣都唔會令你失望，因為星加坡人好愛食炸野，呢度既炸野，實在無得輸！所以果餐，我要飲青檸汁。

好，其實馬來野，仲有一家：話說我朋友一家住在東區，果邊有一條叫Tanjong Katong Road，年幾前去探佢，都見識過呢條街有幾多野食，而上次記得有間舖頭經過岩岩做緊大清洗，今次經過，不得了，典解咁多人排隊既？朋友話，呢間係好出名賣Nasi Lemak，名叫榜鵝椰漿飯中心！其實我已經食完飯兼甜品，不過真係好想食，於是，買番酒店食！

影呢張相果陣9:23pm，有眼見，真係堅排隊。玩法好簡單，椰漿飯一份，要乜野配料自己揀，仲有辣定唔辣：

再一次讚嘆炸物好不得了！但先要講，呢個椰漿飯，叫我撈埋辣醬可以隊三碗呀！咁炸物係點？前面呢塊係魚餅，後面仲有炸蝦同墨丸，樣樣都唔會油淋淋，而且啖啖肉，仲要有咬口有質感有香味！果隻煎蛋，仲有蛋汁架！我諗我愛上佢喇！

好，有一個午餐，與當地同事揀食越南菜，餐廳名字叫Wrap & Roll。我其實早已被門口一張海報吸引，咦？午市都有牛肉酸湯？

我想點呢個，同事話：芥菜卷重口味架播，我話咁我想試下嘛。第一次食，好鍾意喎，果種獨特既香味，加上旁邊呢個汁，好岩我口胃。

好喇，原來呢個Set，係自己包米紙卷！佢附上一個小噴水壺，教你先噴濕米紙讓其軟身，然後將你淥好既米粉呀牛肉呀連同其他配料包起來食。我可以話你知係好！難！包！因為米紙一噴水就曲起，一係就太濕包唔住，但唔好理，因為牛肉好靚，酸湯味道唔夠強，但整體咁包包包又的確幾好食！最後當然隊晒落個鍋再煲啦，好味架真係！同事就話，若果有機會去越南，你肯定食得好開心！

夜晚寫呢篇真係自己囉黎，依家，見肚餓呀！