2016星洲出差：炒蟹拆蟹

我是一個非常怕食蟹的人，原因很簡單，麻煩，成手都係。不過今次到星加坡，有兩晚與當地親友食飯，地點由他們決定，當然食乜都要俾面啦。

於是，連續兩晚，都係海鮮大餐，應該係做左人咁耐食得最多蟹既一個星期，而且仲要親手拆成手係。首先第一間，係珍寶海鮮，帶我去既係在當地做大廚既表叔。分店有幾間，訂檯既係位於河畔果間，仲要非常之巴閉，五點半入座，七點半交檯。

工作完畢趕過去已經六點，表叔一家四口已經到齊，實在抱歉。由於完全佢地話事甚至怕我埋單，所以食幾錢我係唔知，我只係負責食：

胡椒蟹，星加坡既蟹都用斯里蘭卡蟹煮，非常大隻，呢個好香口味道剛剛好，一邊咬一邊啖啖肉之餘實在殼都好好味！

呢個，絕對唔係燒腩仔！係雞皮釀蝦膠，再點呢個蜜糖汁！好食架，不過，我食左一件——阿表妹好勁地食左六件，咁已經無晒囉。

辣椒蟹！佢地問我食得幾辣，我話幾辣都得，咁佢地揀左呢個係馬來西亞既辣。個汁，先嚐到蕃茄味，然後辣味慢慢出，好過癮！食法當然係用炸饅頭去點汁啦！蟹鮮甜入味，就算呢間做遊客生意，絕對有水準。

炒菜就唔介紹喇，麥片蝦就幾好食，無過份調味，帶有麥片香甜，蝦彈牙連殼食都得。

呢個係咖啡骨：好似京都骨但用咖啡煮，肉煮得好鬆化，咖啡香味剛好，係一個平衡得好好既菜色。

無呀，想話地道既馬拉盞通菜真係好唔同，惹味非常咁囉。

另一晚，當地舊同事，約左我去呢個宏茂橋區。此處係大型公共屋村，一間叫Mellben Seafood既舖頭，一樣要訂檯，當然，又係食蟹啦！

朋友點菜，又係兩隻蟹，不過煮法又唔同播：

呢個咸蛋黃炒蟹，個殼真係極極極美味，肉就唔駛講啦，係可以勁送飯果隻架！

百合帶子，無花巧無味精咁囉，不過原來都幾貴，SGD20，差唔多百二蚊港紙。

佢地叫做三菇奶白，應該係白菜仔叫奶白，SGD15。

呢條係菜脯蒸筍殼斑，魚真係好鮮甜，呢條魚，嘩，SGD55！

砂煲粗米粉湯，原汁原味，果個湯，一嚐，嘩鮮甜到不得了！真係停唔到，最神奇係蟹肉一樣鮮甜。兩隻蟹，SGD129。

我地叫炒蜆，佢地叫啦啦，呢碟叫辣椒啦啦。啦啦啦，香港既炒蜆好食好多喇。

由於連食兩日蟹的確又好熱氣，問問同事究竟有冇地方賣涼茶？有！佢帶左我去附近一個商場，涼茶係煲好入晒樽，我就買左呢支凍涼茶：

真材實料，唔苦，似清涼茶咁囉。