正宗台灣小店：請坐

西區多小店，雖然地鐵進駐多了很多所謂高檔食店，不過路遙知馬力，總是不斷的Come & Go。我有時從西環幻變時群組得知有什麼新食店，有興趣就去試試。

今次寫這家叫「請坐」，老老實實，我的確有掙扎過好不好介紹，因為我從知道有其存在，至今一個多月內我已經食過五次！三次外賣兩次堂坐，而每次也是讓我念念不忘，為什麼呢？因為真的吃著他們的食物，彷彿回到台灣一樣，暫時未有得去，咁當然要常常用食物止癮啦！

首先介紹此小店的位置：西營盤水街頂，巴依餐廳落山方向，未到第三街，左手邊有幾間細餐廳，中間那間明明招牌寫住小息站，而店左右又貼住Taste Taiwan就係佢地喇！

以為只有門口一張檯？不是的，廚房有樓梯上閣樓，大約可坐廿人，感覺別有洞天。

第一次，原來想食滷肉飯，點知賣晒，咁，見有人食緊台灣牛肉麵，賣相好得，而且店家仲可以幫你添湯，就叫一碗買走。主廚的阿姨們都是台灣人，我有時會跟他們說國語的。好，先介紹呢碗HK$56既台灣牛肉麵：

紅燒湯底，以我對味精極度敏感，呢個湯底肯定無味精！而且濃得來不會過重；牛肉，有眼見，量多，而且完全入味鬆化，是驚喜水準如此高！麵身偏硬有趙頭，而且酸菜自家製，呢碗五十六蚊，值！我係整碗KO一滴湯都無剩！

當日同時點了炸花枝丸，即炸，廿蚊五粒，都係果句，好令我想起台灣，彈牙足料！

第二次，新春前夕，與同事在weekday發神經從中環搭落去食晏。坐上閣樓，發現原來好多附近既老師已經非常識貨，所以，同學仔通常係樓下買午市便當（喂好鬼得有機會我都想買番個食下）。咁，當日食左呢個：

香雞排飯！話你知，飯類既配菜，次次黎都唔同，好似今次，係配上咖喱薯仔，高麗菜與及台灣泡菜！果塊雞排，炸得香而唔會乾身，非常高水準，呢個飯，抵搭地鐵落去食架真係！都仲未計，午市失驚無神送台灣飲品，當日就係佢地自製冬瓜茶喇！

同事食呢個係炸豬排，我試食左一件，不相伯仲地好味！

之後兩次外賣，分別食左呢兩樣：

是咁的，我想食肉燥撈麵，肉燥唔夠，佢地就話，你點其他，我將剩低肉燥汁俾埋你啦！於是當日呢個炸雞排飯，就變成咁！今次係有薯絲與及煎蛋，醃蘿蔔。試過少少肉燥，我話俾自己聽，我點都要食一次！

第二次，又係食唔到，於是食左豬排乾撈麵，原來撈麵好得！所以，最近呢個星期六，走落去堂食！七點左右，樓上已經坐左十數人，我就點左肉燥乾撈麵與及滷金錢肚，就係咁：

首先，肉燥你地見到，半肥瘦既肉燥呀！真係好好味架！撈麵係已經被肉燥汁撈過，香口，再加上呢個特製辣椒油，三十八蚊，滿口骨膠原！

呢個滷金錢肚，三十蚊，係非常值！因為一咬入口，首先，彈牙鬆化，然後個滷汁果隻滋味，係絕對想落去問：有冇白飯賣？我想用黎撈飯！非常唔明點解佢地唔做滷金錢肚飯，好得呀！汁我都隊晒呀！

寫到呢度係咪好想去呢？首先要留意，一，此店真係家庭式經營，上菜時間有快有慢，但非常好禮貌，即係你去台灣小店果隻Feel；二，營業時間好有型：一至五開午市，四至六開埋夜市，星期日唔開，咁，想食，就自己夾岩時間喇！溫提：越遲去，越少選擇！