我四十一歲（就快唔係），土生土長香港人，沒有放洋留學，不是富二代，但父母很愛錫我跟弟弟們。今天我一直在想寫這一篇，希望用自己微小的力量，分享一下這個題目。
我不會恃老賣老，也不會寫那些很偉大呀要愛惜自己之類的東西，想想用一個很自私的角度去寫人生－－是的，條命是你的，之後怎樣活也是你的，活著，做人，為何好好玩？
還是學生的年代，還被父母管束的日子，我跟很多人一樣，渴望成長－－大個左，可以自己住，可以自己選擇過怎樣的生活，可以食乜都無人管，可以去旅行，可以玩通頂，可以唔番屋企無人哦。
以上的夢想，又或者應該說，希望獲得自由的理想投射，可能很不設實際。但其實，又不一定。我認識有同學真的從唸書時代開始一步步堅持自己的目標，默默地進行，堅揪地成功－－他的成功不一定是飛黃騰達，但對於自己希望達到的目標，希望完成的任務，他真的一一做到了。
你有沒有夢想？沒有？不打緊。你總會對於日常生活中有最享受最快樂的一小部份吧！無論是打機也好，打波也好，上網睇四仔都好，這是你這個階段的人生最過癮的時刻，記住，這種過癮暢快的感覺。
有沒有死黨或者最好的朋友？即是有開心事有秘密有八卦第一時間想跟他分享的人呢？又或者有不快事最頂唔順之際最想佢知道撐撐你那個人呢？有的話，請記住。
父母愛你固然好，父母會跟你溝通關心你就更感動。你知道的，父母愛你，不過你又不一定要為他們而活，他們應該最終都會撐你支持你做你喜歡做的事，當然，每個人的支持方式都不同，但在你得到任何人支持的時候，你是不是一直都是為自己而活？
為自己而活，那麼，為何要活下來？我不會告訴你因為很多人愛你因為很多人會為你而傷心之類之類，因為這都不會是你要活下來的原因。活下來，是因為我想話你知，就算日後的日子未必順利如意，當我們最坦誠的相信自己有能力主宰一部份自己的人生，每行一步每經歷一件事，都是好玩有趣的體驗。
你想體驗第一次出糧那份感覺嗎？無論你選擇儲起還是立即豪花，或者咁大個仔第一次請父母食飯，錢由自己賺然後用，這種感覺，要試。試過自己去旅行未？唔駛跟住父母自己去或者同朋友去果隻，好好玩，無理由唔試下係咪？
自己一個住好爽，係咪由細到大都恨？唔好撥冷水「哪有錢」住，努力工作就算地方細細租黎住果種滿足感果種有個人空間既快樂你想試試嗎？以我做例子，全屋放滿CD，雪櫃廚房放滿啤酒汽水零食，鍾意大大聲聽歌亦得，唔開心就熄晒燈自己摺埋亦得。你又點知你跟住會唔會突然發達？或者你遇上有錢人無端端俾錢你駛呢？又或者你做左份工俾埋你住呢？
寫咁多野，無非都係想話你地知，無人擔保日後條命會點，之不過，若果唔試唔經歷，實在好唔抵：係呀，依家可能好多難關，日後亦大把，不過，就好似打機一樣：你過左關，爆句粗，好很高興，高興一陣，又要過關，但放棄呢就唔知日後有係點：可能開心到你唔信，又或者仆街到你唔恨，不過就算幾仆街都好，每次都話俾自己知，上次經歷既都過左，今次一樣可以。
記住人生有乜令你興奮，記住學習自私地享受生命，當你對於生命自私少少，唔駛諗要同邊個邊個交待，唔一定要做乖仔，放肆一下，過左再算。每個人開竅時間都不同，所以，隨心生活，之後再睇睇啦！
或者你之後順風順水呢！家陣就收自己皮，蝕晒啦！
沒有留言:
發佈留言