又食台北：小店介紹

又係半夜三更寫飲飲食食！是咁的，之前介紹好幾間，最後呢篇係要一次過介紹幾間小店，咁，寫得當然要係唔錯先話你地知，等你地參考一下啦。

先來介紹係牛肉麵，無錯，牛肉麵。不過今次由當地同事帶去食，仲晨咁早已經mark係每日流程，而且派往當地既香港同事都話，呢間，得！

熟成21牛肉麵
位於內湖的熟成21，屬於專經營肉食進口美福集團所開，所以，此牛肉麵旁就係一間專賣肉食既超市，連aged beef專櫃都有，要乜靚肉都有。

係，點食都教埋你，不過台灣好多餐廳都煞有介事有類似指引的。

呢個叫牛之精華拼盤，有牛筋牛肚與牛尾。首先要激讚係呢個牛尾，入味，鬆化，骨肉一咬即分！牛肚果隻爽法，連平日好怕食（因為易痴牙）我都照食！牛筋唔係特別淋，但亦唔會咬唔開，係有趙頭果隻。

自家製酸菜辣醬，特別前者極讚，任囉的。

基本上同行六人每人都叫左碗半筋半肉牛肉麵！首先湯底一嚐，清甜，牛味好出，掂！麵係較闊身，texture好唔錯；最重要係牛肉！真係點解煮得咁準繩？鬆化又入味，牛筋就更出色，呢碗望落唔大碗，但實際份量十足，成碗湯，我隊晒！

東京串門子串燒
呢間，恨食左好耐：都係唔記得邊個飲食節目介紹過，又平又正果隻，但店子坐位極少！當晚，亂入建一失敗，立即打去搏一搏，得左！不過只可以坐街，再加上食下，又落雨，又停，又食，不過因為太好食又抵食，係令我擔住遮食都好有mood，另一邊亦都有一位孤獨的美食家一樣，擔遮食，飲台啤！

串燒選擇唔會太多，好專心做好豬牛羊雞再加少許海鮮與蔬菜，咁入正題喇：

前面係杏鮑菇，一咬落去，爆汁！即係外面燒得香口入面仲好Juicy！後面，孜然羊肉串，以為好柴，結果燒得岩岩好，我係後來再叫多串！

牛肉三款：海鹽，鹽蔥，芝士！雖然芝士未好溶，但一放入口，你真係會明白，點解咁正！鹽蔥同海鹽係我既推介，牛肉質素唔差，而且重點係真係燒得岩岩好，仲要留意番，每一串，都係十幾蚊港紙咋！

呢個係海鹽雞脾肉，無呃你，又係爆汁！

老闆娘推介，蟹醬雞串燒，個人就麻麻喇。結果一條友隊左十一串兩支台啤，埋單，NT$640，無投訴，下次應該再訂位搵朋友黎喪食！

高家莊米苔目
呢間係台灣同事都話質素好唔錯既小店，開得好夜，非常岩半夜肚餓走去食。

要留意一點：有好多小菜，花多眼亂，但無格目，除左米苔目同鹵肉飯之外應該大部份都無寫，你想食乜，問清楚價錢，雖然，真係唔會亂收你錢，貴極有限咁啦！

呢個鹵大腸，好肥，好入味，我係一邊食，一邊覺得膽固醇啖啖入口，但停不了口。

米苔目，非常煙韌！亦有米香！湯底好清，我唔會話無落味精，但整碗平到爆水準好好，想食宵夜此店絕不能錯過！

好，呢次就介紹咁多間。其實同事有一日同我去食欣葉，正宗台菜，又係食到我停唔到口，不過呢間都唔多駛我介紹啦！希望快快手又可以過去啦！