2014年底台北食左乜（二）

部份安哥餐廳不再另提，例如金春發啦，又例如松菸誠品烏龍麵與杏仁豆腐，與及非常遊客既鴨肉扁。呢篇，不如主力介紹三間我首次光顧之餐廳。

大家都明白，我無乜理由介紹親子系列，不過由於今次有小朋友同行，所以開飯餐廳有時都要考慮：有無High Chair？是否baby friendly？某晚，乃當地朋友與弟弟一家的飯局，所以他們選了一家打正旗號的親子餐廳，在信義區新光三越裡面。


此間名叫伽利略親子餐廳，位於信義新光三越四樓，餐廳內有一大型玩具天地，保護措施做足，而連接餐廳旁是露天遊玩地方，另一邊還有小火車可以玩，不過我地幫襯果晚天氣好凍，無理由帶小朋友出去既。

至於食物乃西餐，都非常原味健康而且幾大碟。鑑於當晚輪流照顧小王子，你問我食過乜，我真係唔係好講得出，相就有影低既：

丫，果個南瓜湯，在場人士大讚好飲，亦好岩小朋友飲。

兒童餐！你見啦，個盤靚過人，而且有晒餐具提供架！

印象中味道唔差，好出色又唔算果隻囉。

第一晚睇完Simple Life，餓到不能果隻，去酒店附近搵食，走入一間居酒屋，名叫山喜屋居酒餐廳，開業三十年！由於食食下我細佬落黎Join我，所以越叫越多。而我係寫呢篇先知，原來佢係大安區有間好大間，而且仲係由型男大主廚評判詹姆士主理。雖然主頁又無提呢間，但餐牌價錢一模一樣播！

呢盤高麗菜送既，點一點附上特別醬汁，好好食好開胃。

烏梅沙瓦，NT$100！

呢三片牛舌串燒賣相係麻麻，不過幾好食，NT$150（三串播）

炒烏龍麵係未知細佬會Join之前叫落。NT$150，足料又好食！

NT$100三串呢個肥腸串燒真係驚為天人啊！腸處理得好乾淨而且燒既火喉岩岩好，讓我有兒時食炸大腸既回憶，但當然完全兩回事啦！後來我叫細佬再點，佢都讚不絕口。

第一碟係NT135三串既牛肉串，已經好唔錯，點知之後呢個NT$180三串既和牛肋條，我同細佬既反應都係，嘩，好食到痴線！牛質素高，有油香，而且燒得好Juicy，真係呢個價錢，係咁食係咁食都抵！

老遠果個係雞皮，NT$60三串，離晒譜既價錢，好食到爆；另外呢度有三支雞胗，好似NT$100三串，無野講囉！細佬想食多春魚，原來呢度叫柳葉魚，一條NT$50，佢都大讚！
故事未完：話說細佬點了外賣給弟婦，店家包得非常妥當就不在話下，而後來佢地sent個message俾我：烤羊排，非常好食，讚不絕口。

星期日，在ATT4FUN 4樓找吃，找到一家叫OPA的希臘餐廳。無錯，當然係Baby Friendly的。我地點左一個NT$1380既餐再點其他，睇睇喇播：

麵包送既，熱辣鬆軟；呢個希臘沙律可以既，不過不算驚喜。

呢個鷹咀豆醬加上Pita Bread，好中歐既味道。

先介紹呢兩個湯：左邊係雞肉清湯，右邊係扁豆湯，好清，個人特別喜歡後者，真係唔錯；後面果碟係另點既傳統豬肉丸，味道不錯，不過乾身左少少。

另點俾小王子食既野菇蔬菜意大利麵，我應該無乜掂過，不能俾意見。

套餐主菜之一：炭烤羊肩。細佬第一個反應係：尋晚山喜屋果個好食過佢。我既意見係，乾身左少少。

主菜二號，烤檸檬雞。如果光顧此店呢道菜一定要食！清香雞肉嫩滑，連薯仔都入晒味，超不得了！

套餐甜品，核桃酥，香口但都真係幾甜。

每次去完台北都會好想再去，咁幾時再去？話咁快又下一年啦，下話。