法國印象：南部的兩天（下）

在酒店過了一夜，當然亦在酒店解決早餐啦。之前都提過，法國人真的對早餐不太講究，而且吃甜少吃咸。所以，我這個早上的自助早餐亦心裡有數。

另外我問了同事一件事：為何我這幾天在餐廳吃飯，都不見有湯喝呢？他說，夏天秋天天氣仍熱，法國人極其量會賣凍湯，而冬天天氣冷才會賣很熱熱量很高的湯。所以，洋蔥湯？有，總有些為遊客服務的餐廳提供，都別說很多餐廳都會選擇在夏天放假，八月，可能一放放兩多個星期不開門的。

我要推介這個像嬰兒食品的蘋果蓉，極好味。

午餐，沒有外出，反而跟所有同事一起叫外賣。星期五他們都有個習慣，就是總有一個部門會買來一大堆牛角包跟其他同事分享，而且大家都非常holiday mood。說到這次叫Pizza，大開眼界的是，這裡是容許你每個人就你點的東西俾錢，而不是一條大數俾的：

大家就排住隊認回你點的食物，以現金或信用咭跟呢位送外賣哥哥仔找數。

這個Pizza叫New York，都係我呢類食肉獸至愛，但真係好好食：薄身，香口，料多，但要留意，呢個Size叫Small，加埋水果沙律及飲品，7.9Euro，其實價錢可以的，外賣送到播！

黃昏時準備跟同事乘高速火車回巴黎，同樣在Aix，見人頭湧湧都知出事：同事說，我好彩喇，經歷埋法國人久不久就有的，就係火車Delay。這個Delay一來就個半小時，原本八時十五分到達，結果九點九才到巴黎。亦因如此，我無故要駛多左錢：

去廁所每次0.5Euro！點解呀？點解去廁所要俾錢呀！

同場加映：外國年輕父母都一樣，父母各自玩手機，仔女就自己顧自己。

回到巴黎天黑了，自行轉乘地鐵往吃越南菜。店名叫Dong Houng。我又點搵到呢間呢？話說某一期U Mag介紹法國，果堆個性小店我就無乜興趣，最後果頁編輯手記提到識食就食呢間，咁當然，明知法國咁多越南人，點可以唔試？

我點了幾樣東西：

椰青，有椰肉有水，無加糖水，好原味清甜，4Euro，值回票價。

呢個粉卷，好貴，6.2Euro，重點係，凍冰冰硬實實，無論佢包得有幾多料有幾靚，都係唔要得！不過好彩，個牛河，真係拍案叫絕：

要成8.8 Euro呢碗特別牛肉河，個湯底，一呷，果種清甜牛味真係從未試過，毫無味精，一飲難忘而且愛上，料多，只係牛柏葉換上牛肚，其餘通通有齊，牛肉無雪藏味，牛丸唔似來貨，總之，我真係會為呢碗牛河而記住佢。

此店好多人，十點半Last Order，好似逢星期二唔開，自己Check清楚。食飽，太夜喇，此次旅程第二次搭的士，這次遇上是Cambodia司機，識講英文。不過，我都係睇住佢唔跟GPS而兜路，嗯，巴黎的士司機，俾我印象真係麻麻地。