喪抵日串居酒屋：焱川＋淼川

在各位終於辛勤工作一周終於等到星期五之時，係咪想搵三五知己飲番杯來個合皮Hour呢！原本唔想介紹既呢兩間，諗真少少，無理由咁自私，況且我唔介紹，星期五你唔訂位都唔駛旨意可以Walk In，咁就話過大家知啦！

無錯，店子有兩間，分別叫焱川與淼川，位於灣仔，地址請自查。兩間均有日式串燒與酒，而淼川更有壽司刺身，咁，先來介紹一個全城無敵抵Happy Hour套餐先：

看圖識字係咪高興先！更高興係：每人於Happy Hour之內叫幾多次都得，規矩係，四種串燒唔可以同款。咁有幾得？去片！

啤酒，係呢隻，仲要成支俾你，係咪高興先！梅酒清酒都不賴，特飲就係幾款水果乳酸！

以上串物選擇，我首推燒飯糰，焦香配上脆脆紫菜的確一絕；其次一定食就係煙肉車厘茄，並非行貨絕不馬虎；另外我至愛就係雞皮與雞軟骨，豬頸肉都唔錯。不過請留意：山葵牛舌並非串燒，乃冷盤。

咁，除左以上之外，此店其餘串物都水準極高，隨便介紹幾樣過大家知：

不得之了咁好食既烤羊架，好明顯係用心烤出之成果，剛剛好又帶羶香，我極之推介！

雞翼啊！很有心的切開黎燒，多汁之餘又香口！

前者為靚版串燒雞皮，跟餐果隻唔同；後者，烤牛腸，我好鍾意囉！

我呢，就鍾意白鱔；咁有人呢，就好鍾意雞子咁囉！

我又點會錯過牛舌呢你話！

大大隻既帆立貝，好彩仲記得介紹你地知！

燒物太多不能盡錄！自己去尋寶啦！但不能不介紹，淼川晚市套餐，七十幾蚊，有一客魚生飯（幾款選擇），沙律，麵豉湯與三串串燒！

無論係魚生飯或者蔥吞拿魚腩飯，此價錢是無野講的質素，肯定好食過和ｘ或者板ｘ！

係，除左沙律與麵豉湯，仲有茶蒸碗！死未！

串燒選擇多左一款：免治雞肉串，好食架啊！無記錯套餐仲有小甜品，咁既價錢，點搵！

再次溫提：此店唔訂位真係有點危，另外，坐得唔算舒服，但食物質素實在好，點揀，你地話喇！