我的奧運回顧之頂癮廣告

題目雖然如此寫但，我其實只係想回顧呢兩星期多睇奧運其間電視台播廣告之感想。首先未入正題之前真係要彈有線：例如播排球，八分十六分一次技術性暫停一分鐘，你就走去播三四分鐘廣告，一局波都唔知得幾多分有得睇，所以，永遠迫我重要賽事轉台睇免費台。做左咁耐體育節目，播奧運播到咁，難怪你俾Now過頭啦！

好，若果各位係奧運迷，以下推介至西廣告，你一定有一個有共鳴：

１－益能康

VO把聲已經夠衰，仲要條片內容真係唔明，乜都會好攰架啦！唯一覺得有趣就係：果個睇波好攰好似谷德昭囉。

２。九倉電訊

呢班係乜水？係扮日／韓妹定真係日／韓妹？佢地發姣發凳喪扭個表情已經想扯巴佢，仲要成個廣告都唔知佢嗡乜春，想點呀！

３。股壇紅綠燈

搵唔到原版果個，每次我係國際台見到個廣告都Ｒ爆頭：咦，你想賣你間公司係投資顧問丫，定係推介太極呢？最尾仲要希望太極盡快成為國際體育盛事，真係完全唔知佢想點架播！當然，應肚即飛呢家野，真係超爆笑。

４。植物物語

我知呢個廣告出左好耐，最近姪女睇多左好學唔學亂咁叫『爽』之外，其實我一直覺得最最最唔自然就係MC Jin講完最後一聲『爽呀』之後仲Hold左兩三秒唔知點個表情最頂癮囉。

５。衛訊

即咁，一向都覺得衛訊既廣告騎呢，最新呢個串人地之餘係最最唔明白就係：典解阿爸爸愁成咁？仔仔係咪已經死左呢下？

６。紫花油

多謝你地提醒，呢個可算係我奧運期間好驚見到既廣告。只係講一句，小儀，搵食嗟，就拍左個成為一世人陰影既廣告，真係七到無朋友。

暫時醒起咁多，若果有其他提議我絕對係會放入呢篇文等大家開心下。