瘀到發紫李紫昕

將工人房設於馬桶上的兒歌天后李紫昕姐姐（注意，我絕對係應該叫佢姐姐，睇落去就知），連日來不特止引起全城關注網民圍插，更好笑的乃是她非常不可思議的連環出醜，解釋一次又一次被踢爆，對於呢位一直堅持在娛樂圈生存的長青樹，實在匪而所思。

究竟整件事錯在哪裡呢？容我以個人意見講一講：

事件起因於Purple姐姐於六月廿五日接受頭條日報的家居專訪出街，標題為《星級家庭：兒歌天后紫昕姐姐的幸運音樂家》，當中這張工人房的照片引起全城關注，Caption是：『工人房，位於廁所內，睡床在馬桶之上，故要度身訂造。她解釋說：「因為媽媽唔想同家傭共用廁所，唯有分開空間。」』好，我們在此停一停：

首先，這類名人家居專訪一直都有，惟紫昕姐姐呢間屋，老老實實，裝修老土幾近核突，不知是否因為免費報紙多，大家搵人搵無可搵又有人恨見報所以姣婆遇著姿粉客一拍即合，連這間咁款既都叫『星級家庭』，如此定義實在重口味。不過細讀內文，並無提及工人房，而相信紫昕姐姐絕對有權拒絕工人房曝光，所以我偏向相信有人覺得此設計連《宜室宜居有辦法》都要俯首稱臣，所以極之自豪讓記者報導，而記者，我當唔知，編輯以至總編一定估到，此相一出，有什麼後果，所以，你想型，我送你一程。

報導一出當然大把人出來聲討紫昕姐姐折墮無人性，安排工人住廁所，細菌滋生不在話下，分分鐘違反法例。老老實實，別說聽聞，我親身目擊過的家傭住處有多不堪其實都不是什麼新鮮事，訓廳訓廚房或者好似停屍間設計我都見過，紫昕姐姐呢個超間套房其實地方算寬倘，不明白的就是兩點：第一，工人姐姐訓廁所，生病機會極高，然後照顧屋企人，搵自己笨亦極之低能；更低能就係：都係果句，無人叫你話俾人知你個『星級之家』有個超級屎坑工人套房，你選擇俾人知，你係名人丫嘛，你咪俾人插囉。

出事過後翌日另一份報紙太陽報立即走出來替可憐的紫昕姐姐澄清，除了有與家傭『好溫馨』合照之外，還表示其實那個是雜物房，工人睡的是另一房間，又拍多張相配合訪問。報導與微博雙線出手，可惜，已有網民極之心水清發現，那間房根本是紫昕姐姐的，而同一日忍口唔踢爆的頭條日報，見全民咁大反應立即出黎踩多腳玩踢爆，於之後一日刊登一篇《廁所房真相》的文章，此文一出，簡直是兜巴打埋紫昕姐姐塊面。都係果句：愚蠢接受訪問是可憐，試圖用大話掩飾就是可恥，唔知呢個補鑊方案係咪偉大既誠哥電台諗出黎架呢？

正當證據確鑿瘀到發紫之際，更爆笑既事情發生：當她在Facebook被人插到飛起之際，紫昕姐姐唔記得Logout用另一Account為自己講好話，於是發生紫昕認識紫昕為紫昕平反的大笑話，有圖有真相！

作為一個玩BBS大的人，面對分身的人我們會用ip address來踢爆，估不到紫昕姐姐可能真的方寸大亂，犯了如此低級錯誤，我想，這次她真的要避一避風頭了。

親子的家長們走出來插他，計我話，真係唔好再俾佢唱兒歌接近小朋友：唔係怕佢教壞，係怕小朋友跟得佢多，蠢左。

---

不過整件事有一個非常恐怖的番外篇：話說太陽報替其澄清同日，有另一報導介紹紫昕姐姐，題目為『兒歌天后盛女筍盤』，當中提到被形容為『盛女筍盤』呢幾個字已經係令好多人以為末日真正來臨，重口味到不能，不過文章當中重點係，紫昕姐姐三十三歲？？？？

話說，小弟唸大學第三年，有幸替朋友的創作唱歌唱比賽，同台參賽者就係紫昕姐姐。莫講話當年有幸見到真人真係聞名不如見面，當年得知，紫昕姐姐在港大讀極唔完的音樂課程，同時肯定佢大我幾年。咁，佢三十三歲，我應該得廿八歲。

大家因為紫昕姐姐後生左十年，你地唔好鬧佢喇，呵！