介紹過Food Court介紹過貴法國菜又介紹過遊客泰菜，其實在曼谷的確可以食得好平一樣好好食。不如先由呢個海南雞飯介紹，因為實在平靚正，無話可說。
由Big C面向馬路轉右一直行，過埋橋第一個路口轉右，你肯定可以搵到呢間勁出名勁多人食地道海南雞飯店。名字？咪玩啦，好似我真係無留意囉。
無裝修一樣人頭湧湧，而且好多遊客識黎搵食。入面無英文Menu，不過人人都食緊果樣野，海南雞飯或者海南雞飯加雞肝，當然，當地人會叫半隻雞黎食，我一條友，梗係以上兩款套餐最穩陣，唔駛識講，指住對面果個食乜你食乜，得左。
從來未食過咁好食既海南雞飯：飯香有雞油味又唔膩、雞滑而鮮，青瓜爽脆，配上醬汁實在一絕，極掂，充滿薑粒，附上之清湯乃冬瓜湯，非常清甜。
重點係：以上呢一Set，三十泰銖，八蚊港紙左右，所以，我一口氣食兩個。
另一餐，臨走前一晚，當地同事帶我去酒店附近一間泰北菜館。一行十人，事先向我警告：非常辣。好有挑機意味，即管放馬過來。
檯面放上呢一盤香葉與菜，當地人的確係生食。香葉我可以，但青豆實在唔多喜歡。
飯，好似糯米，香口而好食。
烤雞脾，真係烤得好香，配上特製酸辣汁，好正。
呢個豬內臟超掂！雖然好辣，但真係好好食，連同香葉一齊食，一絕！
兩味都係豬，一個豬頸肉，另一款係烤豬肉條，香口到爆。
呢個豬舌，又係一絕，一定要點果個汁，喪辣但好食。
呢個其中一味好堅既：咁多配料入面既係生蜆肉，惹味勁辣勁新鮮，係有出汗既我！
以上三款都係木瓜沙律，分別係原味、配上生醃蟹、配上咸蛋。咪睇少佢地，佢地預先話呢味好辣，的確係，不過我可以播，又好味。
烤鴨頭，我第一次食，送酒一流！
呢個係粉絲沙律，唔係人咁品，但因為咁多青檸，好鬼好食架！
冬蔭功！見個樣都知生人勿近，但我隊晒，因為好開胃呀！
以上當然唔止一碟，總之十個人，連飲品，食到飽，埋單都聽講差唔多五百幾港紙，所以呢，係泰國，錢真係好用好多架！
沒有留言:
發佈留言