鼎泰豐好得！

師弟從星加坡返港工幹，早早已經約好吃晚飯。他想吃中菜，兩個人比較難，而他住銅鑼灣的酒店，我便提議鼎泰豐。

去年年底才在台灣吃過，我當然喜歡這店子，但重回香港之後我未有吃過。嗯，不能訂檯，惟有早點到。

店子樓底高，所以就算顧客多也不會很吵。那本餐牌很精美，同樣跟台灣一樣，自行在清單寫下想吃的來點菜。不如看看我們吃了什麼：

馬蘭頭，師弟點的。有些朋友不喜歡那味道，但我覺得很清新，而且這個弄得頗有水準。

蒜泥白肉粉皮，好食！肉嫩厚薄適中，味道剛剛好，又不會過濕。

什錦豆干絲，師弟點的，酸酸辣辣好開胃！

蟹粉小籠包，六十八蚊六粒，當然台灣的較好吃，但這個絕對出色，料足，以這個價錢，無投訴。

這個唔得！酸辣湯唔酸唔辣尷尷尬尬，錯誤決定。

雖則只不過係蒜蓉炒通菜，但炒得絕不油膩，味道剛剛好，要讚！

師弟想吃菜肉雲吞，果然不俗！湯底唔錯，雲吞皮薄餡靚，好食好食！

蔥蛋肉絲炒飯，夠乾身，炒得好高質，所以細細碟都好值！

係咪好似我地食左好多？係食左好多，不過每樣都細細碟，最後甜品都唔放過。

赤豆鬆糕，師弟點的。喜出望外就係豆沙清甜，鬆糕之間夾住豆粒，唔錯唔錯，不過我都係比較喜歡以下呢個：

呢個杏仁豆腐，可以話香港好難食到呢個質素，清甜，淡淡杏仁味，滑漏，極得啊！

結果兩條友食到飽成咁，埋單唔駛五百，我覺得好值，又好食。不過下次都係乖乖飲番清燉雞湯喇。