2017年10月13日星期五

台北食極都有:炭烤豚與吉烈牛

即其實本人平日旅行就未必會食咁貴,咁今次都有stay behind放假,自然就食得貼地好多啦(因為自費架嘛)。有朋友問:你點知呢批餐廳呢?其實,面書你加番幾個台灣介紹飲食專頁,見佢地介紹既岩又吸引,就Saved低,出發前好好睇睇自己有乜地方想去,再安排就可以啦。

從來,想食好西,除左運氣,都要努力。

今次介紹兩間唔太貴既,首先係佐藤精肉店akiba,光華商圈附近小巷二樓,都係果句,有Google Map,台灣照道理實搵到。佢地主打乜野呢?烤五花丼飯!
進入店內,首先自動埋去販賣機買食物,然後坐定定等食。睇住不遠處店員開始製作炭烤五花腩,香味撲鼻,越坐越肚餓!不過食之前要提提大家:
食客的基本禮儀,不加一收得平就更加要自律幫手。我睇住有食客食完唔囉番上吧檯係真係會俾店員提醒,所以,記住。
有得食喇喂!
 
特大烤五花肉丼(NTD230)另加溫泉蛋(NTD20)。烤五花好多好多好多好多好多多到離晒譜,而且每一片薄薄充滿炭烤咸香,調味剛好,不用再加其他醬汁,將溫泉蛋撈埋食是無得頂的!五花腩肥瘦適中,應該係點餐後先烤,所以熱辣辣香噴噴!好味道架呢!
此乃自家製薄荷汽水,充滿薄荷葉與青檸,好飲又不會很甜,NTD50。

介紹完豚肉就介紹牛喇:乍牛乃台灣飲食集團王品所開之日式炸牛排專門店,座落台北東區。午市到達都要排不過非常快就入座,睇睇有乜食:
牛方面呢,有牛立方(一粒粒),小牛肋排,炸牛舌(最貴),Prime翼板牛排與及我所點既菲力牛排;至於唔食牛,都有豬,戰斧豬排,我見隔離有食客點,好大份。
入座前先付款點餐,然後被安排位置,店員自然會送上。呢罐Asahi係打卡價買既。
豐富唔豐富先!唔記得提就係,餐具呀水呀自取的。果杯係味噌湯,不錯;甜點係梅子果凍,好好味;沙律用料新鮮,果碗係越光米麥飯,至於重點牛排:
的確幾靚仔,當然牛味唔會好濃,但價錢來講真係抵玩。附上味噌醬及梅子醬汁,另外可以加桌上提供玫瑰岩鹽或者山葵鹽,可以即刻食或者咁:
並不是每一款套餐都有呢個小爐,咁你可以跟佢指示,炙一炙先食,味道又完全唔同播!好唔錯既,而且炸得亦出色,當然牛既質量不能要求,但以此價錢,值得一試架!


沒有留言:

發佈留言