Sunday, April 30, 2017

新加坡2017:Food Centre 的美食

新加坡美食不少,當中最值得試的,不是那些大餐廳或者幾粒星的名店,而是他們的Food centre,因為除了乾淨企理(這個是政府的功勞吧),最重要是價錢的確相宜。

這次很忙,沒有找什麼餐廳(當然有些值得介紹),反而周末由當地朋友帶我去的Food Centre讓我吃得很開心。他們告訴我,Newton是照顧外國人的,而Lau Pa Sat位於商業區雖然不錯但也不夠地道。那麼我今次到過的兩個,或者值得大家了解一下。



首先星期六來個提早的晚餐,五點半到達East Coast Lagoon Food Centre。朋友表示,這個時候來才勉強找到位,因為玩法是這樣的:每張檯都有編號,四周就是不同的檔口,有些你點菜後會送來你的檯,有些則要在檔口外等,有些有提醒你食物已經預備好的咇咇咇顯示器。所以,要搵食,先要搵位才去點食。

首先介紹飲品:呢度多數一係飲椰青再唔係就甘蔗汁,而呢度甘蔗汁好抵飲,鬼咁大杯都唔駛兩蚊雞坡紙,味道仲原汁原味添!
本人一直坐著等食,而朋友則四處去買東西回來吃,的確六點未到四周的檯已經慢慢被佔領:有遊客亦有本地人。然後眼前出現呢幾碟:
左起:炒蘿蔔糕你地應該見過,一邊用蛋炒一邊用老抽,此處出品一般,唔夠熱;其右邊係炒鮮魷,用上好多醬汁呀花生粉呀香料呀加青檸汁咁呀,幾開胃;下面呢個,炭燒雞翼,一邊坐一邊等一邊傳來香味,唔會有可能唔好食的。
炒麵,有蝦有扎肉,偏甜,火喉不錯,只是味道並非我至愛。
仲記得九歲當年跟親戚到馬來西亞,佢地知我鍾意食就晚晚買一大包沙嗲俾我食。呢處豬同雞都好好,肉不柴,而且那個醬頂瓜瓜,難怪旁邊幾位少女真係隊晒一大盤。

椰漿飯,是我好恨食,然後朋友買俾我。老實不及去年果檔,但都唔錯既,而果兩塊魚餅很一般。
呢個咖喱麵係朋友主打推介,啊!超香啊!果真無介紹錯。

我愛酸辣,朋友買來呢碗又酸又辣既粉絲,好岩我口胃,就算飽,都隊晒!

仲有呢個沙律,好抱歉我真係唔多記得有乜料,好似有雞蛋啦有肉啦,又有類似麵糰咁,幾得意。

另一日下午,原本另一本地朋友話帶我去食地道甜品,目的地係Whampoa Food Centre,結果兩間都無開!於是,兩個人食左呢d:

炒福建蝦麵,全場最多人排隊!喂真好食,濕潤而且每條麵條都被汁包裹著,配上辣椒醬及青檸汁,一流!

我更愛呢個鹵麵!點解呢?所有鹵製食品配上陳醋撈麵果吃,真的停不了口!

之後再介紹其他餐廳!




No comments:

Post a Comment