Wednesday, March 1, 2017

Nokia重出江湖

雖然未有時間重溫Oscar,不過當中最最經典的派錯信封頒錯最佳電影相信是歷年大型頒獎禮的三大柒事之一(另一單我一定揀2015年環球小姐,唔知?睇呢度)。有報導指事件起因乃兩名專責派遞賽果信封的某大會計師行職員當時可能掛住Twitter Emma Stone靚相而將最佳女主角賽果的信封交給頒獎人(之前是頒最佳女主角的,這位Brian真的超愛Emma唷),嗯,又一次因為玩電話而出事的事例,非常警世。

剛好又看到諾基亞即將推出其3310型號手機,價錢據聞只是四百港元左右,有人認為這部手機的推出應該是針對長者市場,哈,你這樣想就非常錯了。




首先如果我是僱主,想員工在工作時專心而不會掛住玩手機,這個手電就非常好了!好多智能手機的功能都沒有,而且手機電池勁持久,雖然只是2G而不是3G,假若好似奧斯卡的情況,所有PwC員工要交出個人手機只可以用呢部,有乜事一樣可以短訊與及通話,又唔可以話無電,大家一係專心睇明星再專心工作,發生柒事情況機會大減!

有些工作例如保安員之類,與其揹住對講機,不如考慮用呢部啦!我唔清楚價錢是否較低,不過最重要是輕巧好多,而且跟同上情況一樣:員工當值時手機要鎖在儲物櫃,有乜事就用Nokia!你話驚親人有急事搵你?打呢部囉,又唔係講唔到電話係咪!這個做法,就可以杜絕很多當值時睇股票睇youtube連有乜人想入屋苑都懶得望係唔係都開門的保安員,投訴收少左服務又好左治安都好左好多呀!

當然最驚應該是學生:家長咁驚子女沉迷玩手機,又驚佢唔知用手機App識左乜野人,咁就得喇,要手機,就買呢部。佢起碼唔會日日掛住玩,學校就更加應該鼓勵,只可以帶此類手機番學,其餘一律禁止,咁,家長又可以聯絡子女啦,成個世界當堂簡單左。

Nokia話佢地希望令大家唔好再做低頭族,呢個係漂亮的說法,老老實實低頭慣又點會可以用番部無得玩既手機呢?不過作為我們,又可以想想:買部放屋企都好,你知啦家陣智能手機幾咁貴,又幾咁唔捱得,萬一突然死機無電話用你都咪話唔驚。咁有一部放屋企,可以急用,可以有親朋來港借佢用,唔見亦唔會咁肉痛,係咪好先!

我覺得Nokia好聰明,回想當年大家都愛Nokia,我一直愛佢多過無得撈喇好多。所以,衷心希望Nokia成功,與及即管睇睇,有冇僱主家長真係參考我提議。

希望唔好因為無手電用發生爭執上報紙啦。

No comments:

Post a Comment