Saturday, February 4, 2017

任天堂回溫


早於去年得知任天堂推出復刻版,我等年紀的朋友都非常雀躍,無他,因為就算如我仍然收藏當年那部紅白機與及很多遊戲盒帶,不過仍能如常運作的不多(細佬話我地果部係個火牛唔得喎)。童年回憶能夠重拾,怎會不快樂?

於是,過年前一個飯聚,有朋友表示其相熟店有貨,還是有情價,同場的立即爭相認購。幾舊水,就快快樂樂有得過年玩,就算時間不像童年時的多,也樂於買一部回家去。




這部復刻版,細部方便攜帶,用USB尿袋取電耗電量極低(我試過玩個幾兩個鐘個尿袋都無少左一格),而且內置三十款遊戲,只有一駁HDMI線上電視即可以玩。如此簡單,就算幾白痴,斷估都應該可以順利開機懷一懷舊吧!

於是,過年期間,我帶回父母家跟弟弟玩,很開心,就像回到幾十年前學生時期最愛紅白機加磁碟機的年代的快樂時光,就算只玩一玩個多小時,也是回味無窮。同時,兩名姪女也很開心,彷彿發現新大陸,無論看我跟弟弟玩或者他們玩有些簡單的遊戲,也是娛樂無窮。

至於內置有哪些遊戲呢?個人覺得有些真的比較麻麻,但大家都愛的例如Super Mario與Super Mario 3,熱血物語,熱血行進曲,惡魔城一,Rockman 2,鑿冰,魔界村,魂斗羅,雙截龍2,還有很懷舊的電單車,食鬼及Kung-fu fighting,不過,我跟弟弟很愛玩的好幾款遊戲也沒有:泡泡龍啦,熱血高校啦,排球啦,Konami Baby,City Connection,馬戲團,兵蜂還有足球小將等等,無,實在有點遺憾。

但這個世界上總有其他辦法的!認識的打機達人同學,就教我如何可以另外加遊戲進去!於是,以上的,現在都有!於是,姪女們就目擊我跟弟弟玩熱血高校,熱血運動會,還有弟弟玩朦面超人等等,他們實在非常高興,我們也樂在其中。

實在太久沒有玩,而又很方便,想玩就駁上電線就可以,有時無聊一條友在家也可以開機練練,例如熱血高校如何出絕招啦,我至愛的排球如何扣殺攔網等等。今日細佬慨嘆:點解細個玩兵蜂咁勁,依家覺得咁難玩,佢更神奇係:玩足球小將一竟然仲記得入乜野密碼令球員閒閒地射穿網!

這個也是另一童年回憶:不懂日文,隻隻遊戲都係日文字,連入密碼都係日文字,當年就係咁問人抄番黎然後入落去!

年初三同學團拜,打機達人同學帶部機去玩,於是細路有細路玩iPad,大人就玩筋肉人同馬戲團,大家一起返老還童。

玩任天堂年代已經係廿幾三十年前的事,而現在可以拾回點點當年的歡樂,玩到手指痛,我很享受。

No comments:

Post a Comment