Tuesday, February 7, 2017

下咁咋?《星星夢裡人》

太有期望然後發現實際原來差很遠,那種失望會因為反差而增加。我知道歌舞片不易拍,其實由《92黑玫瑰對黑玫瑰》那種攪笑,又或者《孤星淚》那種盪氣迴腸,Bollywood電影那種獨有風味,我都會明白歌舞在電影中出現的目的,而最重要,劇情要吸引要流暢,無論電影有幾大使命如何致敬,拍攝有幾高難度演員又唱又跳有幾落力,基本做不到,怎樣都不會是一部出色的電影。

我未看電影之前先買了原聲帶,好聽,真係好聽,更令我期待畫面配合,如何成為一部金球獎提名七個中七個奧斯卡提名十四項之大熱電影。我帶住期望入戲院,朋友毫無期望入去,結果兩人中段的確有接近訓著情況出現,而完場時,我聽到不止一位觀眾講:「點解講到咁好睇?好麻麻。」我呢?失望,名大於實;至於我朋友:「OK丫,唔精彩但唔差囉。」




(喂條Trailer真係好好睇囉)故事講乜?男主角Sebastian (Ryan Gosling)乃一位失意爵士鋼琴手,一心希望重振一家Jazz Club來推廣爵士樂;女角Mia (Emma Stone)等待上位演員,因為阿姨的關係可以在影城內咖啡店公作,不斷試鏡不斷失望。兩個失意人走在一起,撻著,相愛,互相鼓勵。開初當然理想大過天,不過當明白事實都要搵食,終於男主角接受現實加入John Legend做主音既一隊少少爵士多多電音樂隊成為鍵琴手而大紅,而你又實估到因為Mia無野撈一心攪一人話劇得唔到男友支持開始怨男友放棄夢想(定係怨男友無時間陪佢)然後分手,跟住又估唔到果場無乜人睇既一人話劇有電影公司中人欣賞而叫Mia試鏡,本來一心摺埋既佢番左老家但Sebastian老遠走去鼓勵佢唔好放棄,結果當然成功,Mia紅左,若干年後,成為大明星既佢亦嫁左第二個有埋小朋友,係某一晚同老公食完飯入左一間Jazz Club,原來係Sebastian開既——即係佢都實現左夢想,只不過兩人緣份已經錯過左。

劇情係咪好老土?唔緊要架!歌舞片若果你成件事穿插得好又夠流暢,歌舞部份畫面部份係可以讓觀眾目不暇給,情緒自然帶動開開心心睇完一場難忘好電影架喇!喇,本人已經聽熟晒d歌,電影開始果段唔知點解出現既塞車大合唱係ok既,但你話好出色咩?又唔覺。之後Mia試鏡失敗被幾個好友叫佢去派對,唱唱唱以為個派對接住會有乜劇情,點知係!無!既!的確係斷斷續續。

好喇,男女主角撻著,個人真係覺得果場天象館唱到飛上天唔知點形容:唔浪漫又好假。之後係咁寰宇風情,就到男主角面對現實Bla Bla Bla然後紅左喇。其實兩個人撻著都無乜交代,都係果句,若果歌舞穿插得宜令主導帶動劇情,部戲係會少左好多悶場。

全部戲唯一令我有少少感動係Mia試鏡獨唱,果段的確拍得唔錯。

好喇,應該係高潮位(我諗我無估錯卦)果段好長既歌舞:如果當初咁咁咁兩個人應該可以好幸福咁生活落去,我重申一次,我唔理你向幾多部經典歌舞片致敬,我唔理你點樣一鏡到尾,如果該段歌舞不能感動觀眾,又或者,前段蘊釀做唔到果種期待,就並不成功。

我好記得睇到Ryan Gosling見到Emma Stone係 Jazz Club出現,走埋鋼琴,又彈果幾粒音果陣,我竟然個反應係:「又黎?夠啦喂!」

想起好多年前睇同樣在奧斯卡大豐收的默劇黑白片《The Artist星光夢裡人》,將明星起落加上音樂動作拍出一部八十幾分鐘好好睇既戲,而呢部星星夢裡人(改中文名果間有冇新意)一百二十幾分鐘,明顯鬆散過長,睇完,我堅持,只要買隻Soundtrack就好足夠,我到依家都聽。

嗯嗯嗯,男女主角係做得好好既,呢方面我絕不否認,唱演跳都做到足,特別我睇過報導,Ryan Gosling事前完全唔識彈琴,經John Legend特訓幾個月先拍,好出色;而Emma Stone,由鬱鬱不得志到後來大紅散發出來不同氣質,好亮眼。

觀乎面書朋友反應好兩極,而比較大批表示一般甚至好唔掂,有幾位極愛。所以,我唔知閣下對歌舞片期望如何,又或者對呢部大熱之作有乜想法,但我都係建議,入場前三思。

1 comment:

  1. Agree, I like 《The Artist星光夢裡人》 more

    ReplyDelete