2017年2月25日星期六

我真係恭喜你

囍事時時有,但能夠得到全城祝福的不多,而得到全城另類祝賀也很少。在衷心說句「我真係恭喜你」的同時,我記得幾個星期前,致電跟我的舊下屬恭喜發財拜個年之際,他告訴我一件很有趣很有趣的事。

話說舊公司需要派一些案子給一些專業人士幫忙,而當中部份專業人士的公司都愛在農曆新年開工大吉的日子親自到舊公司拜年。年初五那個早上,某專業人士一如以往第一時間到我舊公司拜年,而我的舊下屬,在這幾年間慢慢開始負責這些較複雜的案子,所以跟這些專業人士也在工作上多了接觸,當然,拜年也會跟他打個招呼,很正常的。不過這個年初五,舊下屬想也想不到會收到一些驚喜:專業人士向他派上囍帖,而大日子是派帖當日之後的三個星期左右。



我有點好奇問他:「你同佢好熟架咩做乜派俾你?」他否認,還表示舊公司已經好一段時間不會派案子給該公司,因為水準問題。

我問:「哦?做左好耐,有乜水準問題?」他說:「大佬,你都知我唔係特別熟呢一瓣,但有一次竟然我囉住佢份Advice可以連我都睇得出佢計錯數。」當時心想,若果是其他公司發現這些,都不會攪大件事要怎樣怎樣,但肯定會向該公司嚴正投訴。「所以我咪同阿姐講,唔想再派工作俾佢地囉。」明白,非常明白。我覺得若果我要付出每粒鐘幾千蚊的服務費而結果是我幫你執屎,條氣當然唔順,雖然錢不是我付,但你令我做額外而不是我袋果每粒鐘幾千,倒不如我搵間可靠幫到手的公司。

舊下屬所以指出,不明白他為何派帖給他,而更好笑的是,他還問xx坐在哪——xx,也是我的舊下屬,去年跟他成婚了。而xx,早已離開我舊公司好幾年。他說:「連我老公無係度做都唔知,佢都轉左工幾年依家再轉另一份啦,你話同佢有幾熟喇!」

「咁,佢炸左乜野人?」他表示,除了幾位高層之外,還有他與幾位在舊公司工作較久的同事。

「事先又無問我地去唔去,失驚無神派帖,仲要去到陰澳鬼咁遠,玩咩。」舊下屬抱怨。我明,我非常明白,我好好好好耐之前已經寫過,此等無誠意的派帖——唔係熟,無預先問,三個星期前先炸的,就算我當你唔係想搏我唔到都俾番幾舊水人情,我真係一毫子都唔會俾。

我跟舊下屬表示,不想去就別去,更不用給人情。因為,你是他的客仔,他這樣做已經好好笑,你更不用怕得罪他。

然後,當天下午,舊下屬收到專業人士的來電,問他會不會到——巧巧笑,整個次序倒轉,或者有關人士真的覺得自己特別Superior。「佢打黎除左問我到唔到,仲有樣野好好笑:問我點解上年請你飲唔請佢飲喎。我真係O左咀唔識答佢,唔熟咪唔請囉!」

聽到這裡,我完全想不通那位專業人士的意圖:明明好闊綽錢唔志在,無理由四圍炸人,仲要去炸個客。舊下屬後來告訴我,那幾位高層好像到是年初五才知道這件大囍事——收到果下果真初五咁既樣。整個舉動得不償失(例如俾人唱之類啦),莫非獨特的人有特別的思巧方式?

個多星期前跟舊下屬吃飯,因為他堅持要親手派利是給我。我問:「咁你地幾個去唔去呀?」他說:「迪士尼唔係未去過不過去飲就第一次囉,咁你都知要做八婆要付出代價既。我同幾個同事都未決定呀。大佬你知唔知果日有冇米老鼠出場架?」

由於我沒有那份榮幸獲邀就不大清楚了,我只是跟他說:「俾份人情夠你同老公買飛入去玩啦!」

故事說到這裡。我想起我公司有同事準備結婚,他們不擺酒,會在教堂行禮。同事很有禮貌的預早兩個月邀請我去觀禮,我當然樂於出席並俾足人情啦。

所以,若果辦囍事,邀請別人出席,都是希望得到人家的祝福。若果派張帖令到人埋怨你,抱住睇戲心態出席,我除左講句「我真係恭喜你」都唔知講乜好。

我真心恭喜你架。

沒有留言:

發佈留言