澳門正野《西洋菜Seek Your Choice》

當我望望呢個飲飲食食Photo Album，發現有餐廳我再唔寫就真係唔記得架喇！於是，趁仲記得好快快手介紹番！話說十一月初要到澳門一日出差，晚上就相約當地朋友吃個飯。

他選這間叫西洋菜Seek Your Choice的餐廳，據聞好受歡迎而且一定要訂檯，主打西餐，創意果隻。本來我真係幾抗拒創意菜呢家野，不過，你總可以點穩陣既菜式既！至於餐廳位置，唔難搵播！AIA Tower行過少少唔知典解有民居，民居樓下就見啦。

餐廳價錢中上，當然唔飲酒應該無乜事。咁，首先點左呢個沙律：

我幾喜歡既：第一賣相好靚，用料新鮮，紅酒醋並非普通貨式，作為開胃沙律，實在唔錯。

炸馬介休薯仔球，本人好愛好愛馬介休波波，呢家係經改良過，將馬介休與薯仔融為一體，而且咬落煙韌，咸香剛剛好又不油膩，真係好好味！

Carbonara，我其中一款至愛Pasta！呢處做得可以，用上兩款煙肉，天使麵加上蛋汁與及芝士又唔會好濃味，雖不算我食過最正Carbonara，但好唔錯。

白酒煮蜆呢個就好出色喇！首先份量夠，蜆鮮甜隻隻新鮮，白酒湯汁好得，我真係後來成碗當湯隊晒！

最後點左呢個好有趣既甜品：剝皮小蕃茄。用上蘋果醋Jelly浸住兩款剝皮Cherry Tomatoes，清新有趣，仲可以作為清清味蕾之用添！

此餐廳可以再去，不過店內侍應服務真係不夠專業，唔係態度唔好，係有少少懶懶閒咁囉。