2017年1月9日星期一

食在上海:孔雀川菜

一場來到上海總有一餐係要辣,終於某個下午,私人時間,與同學到嘉里中心一間叫孔雀川菜館,食左一餐好地道好味道又份量十足川菜。


由於菜館都走新派路線,所以裝修好西化又Fancy,點Fancy呢?全店都係用湖水藍,入到去你應該預期食high tea多過川菜咁囉。
講下食乜好過喇,我著實睇番都流口水:
水豆豉鵝腸頭,開胃菜,已經感受果種又麻又辣又帶咸香,鵝腸頭新鮮有咬口而且醃得入味,非常好送飯。
蒜泥白切肉,好薄好薄,內裡包住青瓜,蒜泥夠多,好食!
點都要有菜既!呢個叫米湯菠菜,即係米漿煮,絕不油膩原汁原味,菜既鮮甜都感受到。
毛血旺!我終於食到喇!入面布鴨血啦牛柏葉啦魷魚啦午餐肉啦好多好多料,湯唔係一味麻辣,係可以飲或者撈飯,我一邊食一邊尋寶,實在開心到不得了!


天府酸辣湯,好飲,酸辣平衡而且用上陳醋,不過實在太太太太太大碗喇!

另點呢個即榨雪梨汁,咁食辣野當然要啦!咁無叫白飯就呃你既,呢幾個菜咁好食!

小插曲:店員呢都係著呢隻湖水藍制服,問題黎喇:好易污糟,一行近就見到件衫殘晒,另外,佢地行近牆好似保護色痴晒地,呢樣野真係無諗得好周到喇!

下一餐,好有趣,因為上晝同下晝都食同一間菜館唔同分店,到時就知點解!

沒有留言:

發佈留言