Monday, January 2, 2017

食在上海:鶴之舞

新一年第一篇,雖然本人無乜主題無乜Gimmicks亦無乜號召力,不過多謝一直寫又一直有人睇(面書果邊熱鬧好多,點可以令面書既朋友都望下呢邊?)咁我得閒無事都會繼續寫。

上海之旅仲有兩三餐飯想介紹一下,其中呢餐,原本與香港同事一心訂左慧公館,但當晚我同佢分別都要番酒店開工,所以決定搵間近近地食,終於走去恆隆P66。由於晏晝當地同事帶左我食桃花源(你無估錯,香港果間,仲要唔好食好重味精),咁見有間日本餐廳幾唔錯,就幫襯啦,餐廳叫鶴之舞。


其實我主力介紹呢個三百八十幾蚊人仔既二人海鮮西冷牛排雙人套餐就夠喇,因為,係抵食又好食:
前菜係咁,無乜特別,next!
三文魚加洲卷,賣相一般但味道不錯。
刺身三點,食得出質素唔差,特別係油金魚。
大明蝦天婦羅拼盤,喂真係得,炸漿夠薄唔油膩食材新鮮!

茶碗蒸與及鬼咁大隻蜆(仲唔止一隻)既麵豉湯!

照燒澳洲西冷牛排!有相有真相,真係剛剛好medium rare,而且肉質高檔,調味亦一流!
以為完喇咩?我地見到呢個鍋出現直頭暈左!呢個海鮮鍋,除左份量大,材料亦多!其實個餐四個人食都得,真係好離譜!
咁當然有甜品啦!咁既陣容,香港五舊水都未必得啦!

同場加映:因為公司請又因為無預個餐咁勁,我地叫左生蠔:
呢六隻就唔係特別平,二百九人仔,但係水準之高又係估你唔到,肥美又大隻仲full of海水味!

下一餐不如介紹下川菜!

No comments:

Post a Comment