Tuesday, August 16, 2016

三個麻甩遊台北:早餐與甜品

雖然我地都唔會好早起身,但每日早餐一定要食!所以,食過既早餐點都值得介紹一下;另外,有關甜品,麻甩唔係特別喜歡,但非常適合用作餐與餐之間既緩沖。

先來寫寫早餐:西門町豆漿第一個早餐已經食左,同學們大讚蛋餅好正豆漿好抵,咁第二個早餐又食左乜?


原本諗住帶佢地去花咀廚房,但原來九點半過後去到係好!多!人!好彩,我係有後著既,我地去左麥町吐司工房。
辣味肉蛋起司吐司,不是驚艷而是手作心機果種好味,當然仲有好抵食啦!不過我必須承認,講到奶茶,香港無得輸。

有位同學好癲:第一個蛋餅(無記錯應該係烤肉)覺得好正再點多個肉鬆蛋餅!三四十蚊台幣一客,典算先!

其實我地第三個早餐之後,班痴線既同學話唔捨得,係番左黎再食多次!仲要同老闆娘合照添!
呢個係雪花肥牛蛋漢堡,麵包佢再煎一煎先上,好食到癲!結果,我最後既午餐,真係完全頂住晒(後兩篇再講)

咁最後一日早餐食左乜?因為公司有同事不斷介紹有一家蚵仔麵線係好食到番唔到轉頭,於是就到左呢間:陳記腸蚵專業麵線。到達時係要排隊既,而且大家唔介意熱坐晒出面。

唔講得笑!首先大腸又肥又好味,蚵仔粒粒勁飽滿又鮮甜,麵線份量足加上香茜蒜蓉九層塔與及醋,五十五蚊台幣一碗真係抵到爛!食完呢個,你肯定唔會再對阿宗麵線有興趣。

甜品這回事是咁的:第一日食過呢個天婦羅丼,團長早就決定行去西門町,沿途食呢個杏仁豆腐:于記呀,識唔識呀?
我就乖乖食杏仁豆腐,基本上個杏汁已經無敵豆腐仲滑到不得了;兩名同學仲識食:揀呢個杏汁雪花冰。每人可以選四款配料,但配料真係唔重要,因為個雪花冰杏仁味濃而且唔會好甜,一啖放入口已經愛上,連我果位口口聲聲話唔多喜歡杏仁既同學都不停食不停食,仲有人後來自己走去Encore添!

另一日,食完韓國菜,帶佢地散步行十五分鐘,到達金時良房:

同學們好欣賞佢地原汁原味古早味甜品,仲因為我地旁邊坐左兩位台灣太太,佢地同老闆傾下傾下每人多左呢樣野食:
店家自家製綠豆糕!好足料微甜綠豆香好濃,原來可以預訂用作中秋送禮添!

通化街一夜,我帶左佢地食愛玉冰:愛玉之夢遊仙草。

永遠排隊永遠旺場,呢個愛玉加仙草與檸檬蜜糖係我all time favourite,清甜解暑,坐係街邊食都係值既!

仲有三餐,等下啦你地。

No comments:

Post a Comment