Saturday, August 13, 2016

三個麻甩遊台北:通化街晚餐三部曲

同學回程時表示四日三夜食唔夠,早就應該諗五日四夜。作為可以想飛就飛既我當然唔會明白佢地咁難先有Permit單人旅行呢種可貴啦!亦因如此,佢地有部份wish list,係完成不能,例如,喪食夜市。

由於有人話想食正宗台菜,咁,我就帶佢地去通化街,先食呢個趙時機台南擔仔麵。乜黎架呢?其實都係好多年前當地同事帶我食過,唔係只賣擔仔麵,而係正宗台菜,仲要係抵食地道果隻。


店家有地下及地庫,我地結果都係坐地下,比較地道親民(又或者地庫好似好有社團聚會感覺),點菜只要自己揀好交俾老闆就得。咪以為佢地唔友善,實質不知幾咁好人。
同學點既涼伴韮菜,本人唔食,但眼見佢食得幾高興應該唔錯卦,平平地一碟。
我介紹佢地食呢個蘆筍沙拉,其實係新鮮既白筍加上美奶滋,不知幾鮮甜,佢地唔係好喜歡播。

鹵大腸加台灣香腸,點會唔好食呀?我就用最地道方法夾埋生蒜片一齊食喇!
咀邊肉,即係豬下巴,好食到不得了,香口又鬆化,不得不點。
我極力介紹佢地食呢個咸蛋炒苦瓜,好彩佢地都覺得好正,仲好岩送飯添。
九層塔煎蛋,從未食過,無揀錯,因為九層塔既香味好正,而且唔油膩。
炒蛤仔,咪睇佢粒粒唔大,但其實好鮮甜,用上米酒加九層塔去炒,不得了!
本人點既乾米粉撈,無理由黎到呢間唔食既!
咁食法連埋啤酒埋單都係NTD980,你話係咪無野講?

然後食完甜品佢地話要抖抖先去下一站,咁係通化街夜市齋睇唔食之後,我私人要求加插一站:我好掛住既燒肉丼食堂。有一同學跟埋我去,但佢話唔食,因為太飽。不過當佢見我點既送上檯,心動喇播。
無敵海陸丼,燒烤安格斯認證黑牛,加上鬼咁多粒既三文魚子,附上沙律及麵豉湯任飲,NTD360。
呢個牛,半生熟,一咬果隻Juicy法真係唔講得笑,同學試左一啖,唔講野,然後話,我食一啖就夠。後來試多啖加埋三文魚子,果種口中爆發既興奮真係唔講得笑,最好係加埋蔥粒播,所以佢係我食到尾聲講:「你唔好食唔晒呀。」然後再食多啖,死未。

到原定晚餐第三站,老李牛雜,趕及人地收工前殺到。

我其實飽既不過見飲湯又可以啦,牛雜湯(小)六十蚊碗,有藥材味,牛雜其實係牛腩牛肚牛柏葉牛腸,要另外點辣醬先好食。佢地覺得唔夠高興,點左咪麻油炒雙腰:
我太飽無食過,佢地就話唔係好好食。不過小插曲係咁既,話說我幫同學同呢張餐牌影左張相:
據聞同學太太立即問佢係咪飲左呢樣野。同學呢,就回佢呢張相:
知唔知乜係蕃茄牛蛋雙腰?你估真係蕃茄牛肉炒蛋收你百幾蚊一碟咩。

No comments:

Post a Comment