Tuesday, August 9, 2016

三個麻甩遊台北:金子半之助&洛神賦

其實若果有睇此Blog面書,呢幾日我地食左乜大約都有少少印象,不過當然要在此介紹一下。當中有幾間其實係我過去幾年食過又好耐無幫襯既。

先介紹第一日呢兩間,兩間我都未食過,而大家都非常滿意。第一間,
金子半之助,一直好想去:日本來台開既天婦羅丼飯專門店,賣既只係幾款天婦羅丼,店家身處台北車站內。我地十點幾十一點到機場,Uber到台北車站十一點五十分,上到去,嘩,已經排晒隊!

排到咁上下就會俾你揀定食乜,咁呢張menu都有介紹點解佢地咁巴閉:

另一邊就教你點食個丼飯。排左四十分鐘,終於入座喇。
好多人員各司己職炮製炸物,咁究竟好唔好食?
我地選既係江戶前天丼:有穴子魚(即係白鱔)一整條,大蝦,魷魚小乾貝,海苔,青椒,溫泉蛋,全部都係炸上。有眼你睇,澎湃到呢!仲有,其中有位同學非常幸運,因為佢地上檯時話有隻溫泉蛋壓扁左,另外送多隻俾佢!
真係無野好講:穴子魚除左大條係炸得外脆內鮮而軟,蝦大隻而彈牙,最最正係炸海苔。聽佢講食完穴子魚同蝦再隊爆隻蛋撈勻飯黎食,飯本身已經有特別醬汁,係帶有柚子味既醬油,真係好好好好味!你係無可能留低一粒飯架!

此丼,NT$390。

夜晚,麻辣火鍋。即咁,我已經放棄馬辣,因為分店越開越多遊客越來越多(仲好多講廣東話)但質素就不斷下降。於是出發前上網做功課,決定試呢間:
洛神賦麻辣極品鴛鴦!面書話要經eztable訂位,然後eztable又有優惠;訂座仲俾埋錢呢,可以得到NT$600一位全包連埋加一,係位位慳左NT$82!
湯底,有做功課既我揀左麻辣加豬骨白湯。麻辣湯一開波係可以飲既,香醇帶藥材味,唔會搶喉,而白湯就非常鮮甜,一飲就知無添加!
可選食材就咁,要留意,牛,都有好多種!



無呃你,豬牛羊雞樣樣都好食,而且切得好薄,好似梅花豬,只要輕輕一燙就食得!
調味料選擇多,同時佢有兩款教你跟住調既,其中一款有果醋唔落醬油,果然用來點肉,好鮮味!

雪櫃飲品任飲,我至愛呢個維大力。


其他食材都非常唔錯,必點一定係豬大腸,牛肚,牛筋,蝦滑墨魚滑,仲有鬼咁大隻既鮮蝦。

另外,店員服務好貼心,周不時埋黎幫你添湯清碟,絕對高水準。

雪糕有比利時雪糕與及movenpick,味道選擇亦多。

兩粒鐘真係好滿足,仲要呢個價錢播,CP值超高!呢間下次一定再去,因為湯底同食物都高水準,記住,先訂位!
之後再介紹其他食店。

No comments:

Post a Comment