Thursday, July 28, 2016

去吧!追捕寶可夢

是的,從星期一公佈可以下載之後,全香港不知有幾多人正在努力「很想去捕捉他」,星期一下班後由寫字樓離開、在升降機、在街上、在地鐵站都開始有人像被鎖定在地上低著頭捽捽捽,好像集體撞邪一樣。

寫這一篇之前先要作個聲明:這個我不玩,這幾天臉書不停被洗板我都覺得幾煩,但其實我都有玩手機遊戲(都唔知邊個改"手遊"呢個名,我呢排電視廣告成日聽到手X),我依然長情地玩Simpsons Tapped Out, Words, Word Streak甚至Angry Birds,我認同打機是開心與放鬆的行為,不過這幾天我眼見的聽到的,實在有需要寫一寫出來。

打機是個人的,你開心其實無問題,所以我從來覺得沒有必要叫人不要玩,笑人低能--人地都話我玩Simpsons Tapped Out無聊。只不過玩還玩,若果玩到命都無,值唔值?我見有人過馬路時在玩,等地鐵時在玩,頭向下望手指向上揮,四周發生什麼事完全不理,遲早有人遇上交通意外。

還有,親眼目擊有母親掛住玩連仔都唔拖,小朋友應該得三四歲,到時走失衝出馬路或者被人拐左,怨邊個?怨隻精靈?

另外,對於要搶手機的人,這類訓練員的確是最佳獵物--連有冇人埋你身想偷你野都唔知,對眼只望住電話掟波,搶你手袋又得,搶你手機亦得,得左。唔好話我亂寫,外國已經有案例,唔止一單。

外國還有例子有小朋友與人Team up結果被綁架,引申下去,要發生很多事也不是沒可能的。

噢,今日好似有報紙寫行山路線捉精靈,我聽完真係好擔心:好日都唔運動跟住話不如拉大隊去有益身心,但個個垂低頭唔睇路,唔知大家掛住捉,會有幾多人跌落山又或者受傷,又要勞煩飛行服務隊呢?

昨天才有舊同事告訴我,公司午飯時間安排講者辦講座。兩名後生的同事,坐得都幾近講者,竟然垂下頭在玩手機捉精靈!同事表示他們不是自己的下屬,我叫他還是跟他們的上司反映--喂大佬,同客開會都玩,當個客無到,同時落公司面,提點他們一次,因為唔知佢地下次會係乜野場合繼續捉。

打機呢無錢落袋架,打到份工都無埋呢無人可憐架播。

最後最後最後,無論各位訓練員幾咁投入都好,麻煩千祈唔好自私:剛剛於中環某七仔,兩三位女士捉到入七仔,然後全神貫注於飲品櫃外築起人牆,直至我出聲佢地先識彈開。係呀商機無限但你阻人做生意,睇下你會唔會俾人問候全家?同樣道理啦,要玩,唔該企埋一邊,唔好阻住其他道路使用者,多謝。

繼續捉啦各位,其實呢,前排明明好多人走出黎話任天堂夾硬改左佢叫寶可夢好唔尊重香港又話要杯葛又話乜架,點解依家無聽人咁講既?咁,你地同強國大媽囉住部唉瘋叫人唔好食家鄉雞無乜分別咋播。

No comments:

Post a Comment