Sunday, July 31, 2016

重遇曼谷:雜食紀錄

剩低幾餐想特別介紹,就用一篇作結。回程先發現竟然無去食海南雞飯,真失敗!不過今次實在食左唔少好野,有朋友問:你點搵餐廳?通常我出發之前都會上網望望,睇睇最近有乜餐廳推介,包括雜誌介紹與素人食評,因為好重要,你要了解究竟係賣廣告定係乜,同時亦要了解餐廳賣點,例如有d擺明賣裝修,咁就同我唔多關事喇。

第一間想介紹既,係位於新商場Emquartier既Doong Aroi Ded。據知此餐廳乃去年泰國最佳餐廳之一,位於商場高層美食迴廊:即係係咁轉上去都係餐廳咁,好有趣既設計。呢間食乜呢?就係泰式粉麵,當然係高檔版本啦。


此乃澳洲和牛泰式酸辣粉絲,玩法係咁既:你可以揀湯底:清湯辣湯酸辣甚至乾撈都得,可以揀要乜野麵米(共七種),然後就成事喇。呢碗大約七十蚊港紙,首先和牛半生熟,量多而質素不錯,一放入口就知,嫩而充滿牛味!另外附上泰式牛丸,細細粒牛味濃,仲有兩件炸雲吞播!成碗都好好味,我係完全KO,當然嫌粉麵份量細可以選大碗,唔駛九十港紙一碗。
另外呢個係炸魚旦與牛丸,點呢個酸甜醬,三十蚊港紙,好好味架呢!

然後又番黎Central World:呢間叫Zen Cucina係做日本菜,裝修好靚簡約得來有極調不會奢華,而且有半露天位置。我點左個叫Nigri Sushi Special Teishoku,約百五蚊港紙,除左有沙律茶蒸碗麵豉湯之外,主菜係咁:

唔係講笑,質素好高,特別係拖羅,肥美到呢!
呢杯另外點既,好好飲。BTW,泰國好多壽司餐廳,由平民價到貴價都有,不過我幾個同事有兩個好有趣:愛食日本野又唔想食生野,但又會鍾意食三文魚刺身。我好想話佢地知三文魚刺身真係少食為妙,不過,我無。

最後介紹一個已經完左既期間限家flee market:TFEST,除左有野買,最吸引係有好多好多好多唔同既小食檔,而且排刑整齊乾淨,實在非常好買好食。咁我食左乜呢?

冬蔭功乾撈米粉:店家特製冬蔭功醬(有得賣走架),豬肉片豬肉碎,半熟流心蛋,炸豬皮,撈埋實在好滿足好好味,廿蚊港紙都唔駛。

另一檔,我真係無辦法唔食,因為係即煮一口西冷牛扒!我拍左條
短片,唔知你地睇唔睇到,睇唔到就上番面書搵啦!

只係大約四十幾蚊港紙,啖啖靚牛扒,仲有Gravy與及少量薯仔,真係好好味,當日見到幾位興奮到不停爆粗既香港女子都買左,仲即時照相呃like。

即叫即製睇佢係咁榨汁既沙冰,十蚊港紙都唔駛,開心到不得了。行多陣落左格,最後再食多樣:

呢個叫Thaiger,即叫即製,主要係果個辣既Thaiger Sauce,真係好食!三十幾蚊個,首先麵包係有烘過而且鬆軟,內裡既漢堡扒好Juicy,洋蔥蕃茄生菜新鮮,一邊食一邊叫好,與及唔明點解自己食量細左咁多。

好喇今次既曼谷係咁食又介紹完畢喇,下一站又好快出發喇yo!

No comments:

Post a Comment