2016年5月16日星期一

去銀行公會飲茶

中環飲茶選擇的確唔多而且貴:美心大會堂比較遠點心有推車仔選擇多不過好貴,怡和大廈地庫怡翠軒其實唔係主打傳統點心,美心貨式你明架啦唔會難食亦唔會有驚喜囉,翠亨村超貴份量又細。直至好幾個月前,與中學同學食飯,師弟帶左我地去華商銀行公會飲茶。

呢度係要入會既,年費HK$150,若果係中資銀行員工年費HK$50,咁有乜著數?除左睇我下面介紹既食物之外,呢度飲茶,係唔!收!加!一!


此處點心選擇唔算多,而小菜係會定時定候轉,所以,食過兩次都有新野食!點心係傳統款式,水準好唔錯,不如望望啦下:
糯米包呀!你都有眼見幾飽滿架啦!
呢個鯪魚球真係好食,而且好大粒,實不相瞞,我好怕一咬落口就有腥味,呢個唔會,非常好食!
小弟至愛既綿花雞,你見啦,唔花巧好足料又份量多,所以真係好讚。
紅油抄手,粒粒雲吞都異常飽滿足料,辣油好香!
呢度既沙薑雞腳又係勁推介!入味啦一句講晒!


以上唔駛介紹喇,每樣都唔會失望,正正經經既傳統點心!

咸水角與春卷,炸物方面都做得好出色,唔油膩但好脆口。
椰汁糕,切得非常不齊整,但係最懷念果隻味道播!

小菜都好唔錯,食過幾樣,睇下記唔記得係乜:
呢個第二次去無得食!係用陳醋炒海帶海蜇西芹肉絲,非常開胃好味!
杞子豬潤浸時蔬,你地見啦,豬潤真係煮得剛剛好架!
呢個炒飯,唔記得名喇,但你見啦,好好好多料,而且炒得乾爽,係每一次都要食架!

此店呢,請記住,唔訂檯唔好諗住黎搏下!咁啦,先去入個會,再訂檯食啦!據聞晚市都好精彩不過我就未試過既!

沒有留言:

發佈留言