Wednesday, April 13, 2016

廿幾年前的《王靖雯》

昨天,看到竇靖童要出碟了,她的歌沒有聽過,不過這個消息卻讓我想起,廿幾年前,我在聽其母的出道作品無奈那天。跟很多人一樣,對於王靖雯,首兩張大碟並未有太喜愛,直到第三張大碟,我是被又繼續等靜夜的單簧管所吸引,然後就是多得他,後來才買回首兩張大碟。

《王靖雯》推出的時候,我唸中三。今天再拿這張CD聽,回味那個剛剛被戴思聰介紹出唱片還帶濃濃土味的她,同時也回味我的那些年。





或者當時新藝寶對其信心都不大,1989年廿歲的她,極重手的化粧,三十歲的打扮,實在好是但。不過當然可能當事人都未有任何時裝觸覺,並未出國留學。

講歌:其實第一首見街,應該係唱其唱片監製梁榮駿,即係日後既名監製Alvin Leong所作,參加亞太金箏流行曲創作大賽。有趣既應該係填詞果位叫綠葉,同一唱片亦有填另一首歌。阿靖雯演譯此歌獲得季軍,不如睇睇呢條片:

靖雯一開口就走左音,同埋極之娘爆既唱功實在係難得一見,不過同時亦與呢首歌極之配合。係,綠葉原來係一位女士。

正式第一首派台作品係改編EPO林夕填詞既無奈那天,佢後來都改過好幾首EPO既作品。的確佢唱EPO作品係幾唔錯,當然第一張大碟唱功仍屬舊派,廣東話發音可以,但的確唱得不錯。睇睇呢個無記MV,靖雯個Look好村姑,鄭麵就好430。


都話左唱電視劇歌對於新人曝光好重要:當年TVB好實在拍左一套五集講述香港人面對即將回歸既電視劇《香港雲起時》,主題曲就係同唱片公司Beyond所唱無悔這一生,插曲就係靖雯姐既藉口。此曲改編國語作品林振強填詞,講述明知快要分手仍裝作不知道的少女心事,至今我仍記得是電視劇歌。
MV中既佢明顯好睇好多亦有番時尚感,好多朋友同我一樣好喜歡呢首歌,或者今時今日再聽,經歷多左,感覺更深刻。

同唱片亦有與Beyond合作既作品:與黃貫中合唱未平復的心,此曲由同公司李健達作曲陳少琪填詞,唱的,應該是同年發生的六四事件,而且還派台拍過mv。
當年我應該租過此碟番屋企,最鍾意既,應該係呢首:有緣的話。唱片公司高層兼名DJ陳小寶獻聲獨白,一首好民謠風作品,但苦澀味好濃,今時今日我仲識唱架。唔知有冇拍過原裝MV,但寶麗金有拍過卡啦OK,呢個,勁呀,男女主角你睇下識唔識:
無錯喇,就係仲未變黑好MK既古天樂,與及少女到你唔認得既文頌嫻喇。

另一首就係改編日文作品既尾班車,此歌當年亦非常多朋友喜歡,而且落K都有唱。而當事人竟然係2007年演唱會有唱過半首!
改編Torn between two lovers都非常不錯,
中間人係當年果隻好多人唱既love ballad,當然,當年既佢,唱得唔好有感情。此唱片其實歌曲品種都好奇怪:改日文歌改英文歌,無啦啦又走去改恰似你的溫柔成為愛聽謊言!我諗佢應該兩三年後已經唔多想唱呢首歌,娘成咁!梁榮駿先生另一首作品溫柔的手亦屬老土野,聽完無乜印象果隻。

反而放在最後一cut,林敏怡作曲文井一填詞既新生其實都幾有味道:係舊,但好有果個年代果種感覺。
睇番呢張大碟,就會發現佢個女幸福好多,起碼,可以唱自己想唱既野,唔駛唱埋一批一世都唔想唱番既老土野。王菲之前的王靖雯首部曲是這樣的,你覺得如何?

No comments:

Post a Comment