Friday, January 1, 2016

影視紅星

我喜歡看平面廣告,特別是那些找人代言那些,無論是在地鐵站內還是街上貼出的海報,還是那些牆外高高掛廣告,抑或在商店外貼著的,都很有趣--有趣的重點是看他們找了什麼代言人。

這一篇不是想寫那些關公災難找什麼人當代言然後得來剪咭被恥笑等反效果,我反而想充說,有沒有留意那些代言人的照片旁邊,除了名字之外,大都有幾粒字的形容詞?例如乜乜乜代言化粧品,會得到「影視紅星」乜乜乜。


老老實實,「影視紅星」呢四粒字實在老土到不得了,或者應該話,是非常八十年代的形容詞。所以,我第一次睇見翠如BB幫某某商品拍硬照廣告,我看見黃翠如配上影視紅星,實在唔知講乜--仲要果陣佢過左CCTVB唔算好耐上過一套劇集咁大把,是否配得起呢四個字實在有好大疑問。

又記得一年前左右,中環中心附近對面某大廈有一塊幾層樓高既牆外廣告,係美容公司,果位代言人,一名少女。自問成日睇娛樂版,不過真係唔識佢。廣告上有介紹佢個名,旁邊果幾粒字無記錯係「人氣新晉歌手」。嗯,我唔識佢,連佢有唱歌都唔知,不過果刻我諗,其實,美容廣告想順便幫呢位歌手宣傳,但係我睇完呢個硬照廣告,會唔會有興趣了解佢唱過乜野歌呢?又其實,美容廣告只要放張個樣靚既相出黎就得,要有明星效應起碼都搵個認得出既人啦,下話?

「人氣」呢兩個字近年時常出現類似廣告代言人名字旁邊,老老實實有人氣就唔駛寫自己係人氣乜乜物物,通常無乜特色唔知點形容佢先會用呢兩個字。

最近在小巴上看見另一廣告,呢位藝人近年都唔少廣告--張國強。跟住佢個名果四個字叫做「資深藝人」,其實呢四粒字好地地,當大台為左令旗下非一線藝人都有得搵下錢既時候越黎越多綠葉藝人都賣廣告,「資深藝人」呢個Term應該係最岩用,唔通寫「出色綠葉」同「資深甘草」咩!

不過其實有冇發現:近年除左藝人之外,好多唔同界別既人都成為廣告代言人?財經界名嘴,youtubers,體育界,前新聞主播,網絡紅人。有時都會懷疑一種商品如何決定用邊個代言人:將貨就價之時,其實係咪一定要用代言人呢?

對於藝人,希望大家努力--當你成為廣告代言人,大家見到你個樣就知你邊個,唔需要寫你個名仲要加幾粒字介紹。或者可以一步步黎:當你進步到下次拍廣告只寫你個名已經代表你多左好多人識,放你個名原因可能係因為張相執到唔似你怕大家認唔到,到再進步日後你拍廣告人地一睇你個樣就知你係邊個,例如古天樂,又例如魯芬。藝人們,你地要向邊個方向努力都請你地加油,新一年,俾心機啊!

No comments:

Post a Comment