Sunday, November 22, 2015

又食台北:欣葉台菜

既然有朋友希望介紹,我又真係有影過相,咁就寫埋啦。欣葉台菜,聽就聽得多,知道出名,唔知依家香港仲有無,但台灣依然是老字號,而且算中高檔,賣的是最地道的台菜。

我是跟同事去吃的,在中山區的新光三越八樓,望望四周食客,都知此店並非平民店,不過,望過餐牌,價錢又唔算好貴。香港人由台灣人帶去吃台菜,我完全無俾意見食乜,由同事們發辦。


能夠如此放心,並不因為我不偏食,而是其實自問對真正台菜認識不深,倒不如讓在地人介紹好了。首先上場的,不陌生:
菜脯蛋,作為潮州人當然吃過,爸爸在家也會弄不過我多數唔多食。這個很簡單,沒有多餘的調味,跟爸爸所弄的最大分別,就是這個真的像一個餅,厚厚的,內裡仍有少許蛋液。
同事問我有吃過地瓜葉嗎?我話,當然有啦!番薯葉其實好好食,用蒜蓉清炒已經足夠,最重要係唔會炒得太過軟身或者又硬。
原來台菜必備地瓜粥!這個香港真係未食過,帶甜,清淡,此味道其實幾唔錯,特別用來配之後有幾味高膽回醇肥膩食物。
呢味都仲叫清淡!台式咸蛋蒸肉餅(佢地叫蛋黃肉)係厚厚,好似開罐午餐肉既厚度,而且豬肉唔會係絞到免治,所以要蒸熟又令肉質唔老,有難度。
黎喇黎喇!至岩口胃味菜鹵大腸!高級餐廳既大腸當然處理得乾乾淨淨,而最重要係,鹵得入味,還啖啖肥美,實在係食到欲罷不能,飯都爬多幾碗呀喂!
花生鹵豬腳!入味唔在講,鬆化又唔在講,令我呢個對於中式豬腳一向麻麻既都食得津津有味,女同事當然對其骨膠原絕不放過啦!仲有,你見啦,其實真係完全唔肥膩果下先離譜!
五香炸雞卷,外面酥脆內裡啖啖肉,味道不會過濃剛剛好,配上醃菜與芫西更好食。同事知我鍾意,留多一兩件俾我,不過最邪惡既,應該係呢個:
呢味,香煎豬肝,完全令人喪失理智:首先,你知道食多件好麻煩,但當你食左第一件,果種香味,咬落去剛剛好既粉粉既感覺,厚薄適中,驚為天人!所以,你好難唔再食落去,就算你知道,呢舖真係對健康唔多好,只可以同自己講:我又唔係長駐台灣一次半次可以啦。
剛才所有食物係四人食,好似有少少誇?食晒播我地!呢個客家麻糬係送既,熱辣辣,完美呀喂!

若果來台灣食坐得舒舒服服食正宗台菜,欣葉的確係不錯既選擇,不過據聞唔訂位就比較麻煩,咁你地自己識做喇。

No comments:

Post a Comment