Boqueria的西班牙Brunch

跟很久沒見的朋友來個飯聚，她是當年唸法律的好同學，一位很勤力的韓國太太。最近得知她回來香港，當然找她吃飯，因為我們唸書時就是飯腳了。選了Bouqeria，個多星期前訂到位，因為餐廳的周六Brunch常爆，無Walk-in。

這是一家西班牙餐廳，周六Brunch Buffet玩法是這樣的：每位HK$288，由頭盤食到甜品，可以安哥，另外每人送上一隻即開生蠔，想任食咩？加多HK$128；飲品，加多HK$188可以任飲啤酒鮮榨果汁與及Sangria，想再豪ｄ？得，俾多一舊有Cava, Wine, Bloody Mary任飲。

十二點到四點，基本上無可能唔夠時間食，在乎只係你食到幾多。

叫做自助餐，又唔駛你出去囉架播！佢會好似賣點心咁，由第一道菜慢慢上俾你，鍾意再叫佢俾。我話你知，你食晒佢一Round已經好飽！

其實生蠔好好食，不過咁多野食就無額外落order。Sangria，好好飲，有紅酒白酒兩種，你鍾意仲可以自己出去溝。

第一輪係沙律同蔬菜，新鮮爽脆用料講究，另外呢幾隻蝦，好鮮甜啊！

是我懶惰無出去影！個個出左去影呢個大大鑊西班牙海鮮飯，我就等佢分俾我食，好得，我有Encore！

Tapas與西班牙黑毛豬風乾火腿上場喇！

蕃茄凍湯，非常醒胃。

主菜上半場！重點推介當然烤乳豬啦！睇住佢切架，好味香脆！

燒牛肉與烤羊架，絕對高水準，好過好多酒店貨色！

當我都唔知食左幾多野，甜品出現喇！上面果隻西班牙油炸鬼好味，但下面既玉桂蘋果同Brownies先至邪惡！

另外呢，一大班人黎氣氛好好，店員會囉住一大壺長咀俾想挑戰飲酒既朋友，兩呎咁高倒落你口，另一位侍應就一邊數你飲左幾多秒一邊叫，我就無試喇。

我諗我會再搵朋友黎食多次，水準高絕對食得過！