Tuesday, July 28, 2015

精彩隱秘小店:生記茶餐廳

這樣的年紀,難免遇上出入大酒店,這次是朋友的爸爸仙遊,一大班朋友都有心地到靈堂致祭。過後,朋友聚頭也是要醫肚的,這次不是老坑火鍋,而是附近的生記茶餐廳。

店的地方不大,但貼了很多明星到來的照片--關於這個,最後要說說小故事,而我們一行十人,重拾美食蝗蟲本色,食七咁食,仲要埋單發覺,抵到爛。





這裡有兩樣食物是必點的,先介紹這個羔蟹粥:


二百一蚊左右鬼咁大窩,羔蟹大大隻好多羔又鮮甜,粥底綿到不得了又盡吸蟹之精華,沙窩底有少少粥是痴底的,至正呢部份,咪錯過。
炒麵,係,Out Focus,有原因,因為太太太好食,炒得好乾身,味道剛剛好,真係不知不覺就隊幾碗停唔到!
籠仔蒸飯係有幾款既,由於當日又話蜆賣晒蟹又食過,蟶子啦咁!話你知,下面既飯略略炒過,吸收蒸蟶子既蒜蓉豉油與粉絲,無論你幾飽,你都一樣會食!

八爪魚丸,又係好食到叫出黎!首先,極之彈牙,當中混入新鮮八爪魚粒,鮮甜到不得了,又大粒,炸得剛剛好,必點呀喂!

其他好好食但影唔切包括有雞翼啦,椒鹽八爪魚咀,蒜蓉蒸茄子都要食,至於努力推銷HK$38買四送一既蟶子王,普通啦,唔算大隻,而冬蔭功浸螺呢,個冬蔭功味道唔多岩口味。

大插曲一段:話說牆上貼明星相都同一位以為佢都係明星既男仔合照,再睇牆上餐廳報道,八十後廚師!之後同檯幾位女士就不斷試圖或意圖入廚房附近偷望。師傅仔出過黎一次,真人黑瘦應該捱得辛苦但的確幾靚仔,可能被幾位女士嚇親,之後成晚,都無出過黎喇。

真係勁抵食,係唔就腳,但若果過開黎的話,極之推介。

No comments:

Post a Comment