Wednesday, January 14, 2015

過主啦香腸人

話說某個名叫「香腸」地方的掛名話事人發表一年一度的屍政報告--為何名稱如此呢?因為話事人一開波,開忠名義指「香腸問題,香腸解決」是違憲的,簡單來說,掛名話事人想告訴所有香腸人:你雖然包左層皮改左個名,但你個心其實都係豬肉,所以,香腸不能話事,點都係豬話事。

既然如此,對於屍政報告的閱讀角度,香腸人大可當一場戲,又或者,預視自己身處的地方,將會變成一個如何恐怖的實境逃脫樂園。


首先我相信因為去年果幾個月空氣清新大行動,掛名話事人一如以往發揮其語言偽術:功就佢領鑊就你揹,大讚空氣清新左,然後再插違法,再落重藥關注年輕人:「五歲小朋友問我大個住係邊?」,小朋友,你年紀太細,屋企又淨係睇Disney Channel,你梗係唔知話事人叫大家長大之後回國發展喇!咁,你大個就梗係唔會住係香腸啦!

唔信?首先話事人話,中小學都要跟國內學校結盟,然後中小學學生每人一定有一次回國內交流。究竟結盟目的係乜,又有乜好交流呢?我知,小朋友你細細個就已經學習普通話,肯定可以好叻叻咁同國內小朋友溝通,不過我未諗到交流乜既時候,有一樣野肯肯定交流左:就係病菌。

小朋友,咁大個左又點呢?話事人好努力安排不同機會俾你地回國,開口鼓勵之餘最新就係幫你地搭路番去做義工--義工,即係無償,幫助有需要人士係好,其實本地唔係好多人都要幫忙咩?做乜要番去呢?小朋友,叔叔對於歷史就唔係咁熟,不過我都知道,乜野叫下鄉勞改。唔識?你上網好叻,仲唔去谷哥一下?唔係轉頭遺忘法一出,你搵唔番答案架!

小朋友你肯定細細個就入過戲院睇戲喇!話事人呢,話要起多幾間戲院,透過鼓勵香腸人製作電影與及年輕人欣賞電影振興香腸電影業。叔叔就唔知原來香腸咁缺戲院,明明呢幾年仲有戲院頂唔順執左,不過若果由政府成立既,仲要鼓勵香腸電影業,話事人一定會搵業內成功人士主理架喇!例如你都未出世就拍過好多好戲既惶精,與及膠志新兩位導演啦!之後你會發覺香腸好多鼓勵大家愛豬既電影,愛豬愛國,香腸有責,仲可能套套戲都講普通話,小朋友,你一定會睇得好開心架!

另外我仲見到一項好有創意既政策:話事人建議推動香腸水上活動,我就諗到,或者有水上實境偷渡走私冒險樂園,小朋友齊出海執垃圾遊戲等等。係咪聽落都覺得興奮呢!

不過都要提提各位年輕人:想搵份一畢業儲五六年錢就夠首期買樓?選區議員啦!依家仲話每年有一皮野外訪津貼,不過咪話叔叔唔提醒你:你若果俾人登記左名呀,慈母特別記住你呀,我怕你就算當選都用唔到果一皮野,點解?乜你覺得你出到境咩?

至於叔叔我呢,真係聽完掛名話事人講咁耐都對自己無乜得著,只係越睇越迷惘:叔叔都係時候好好諗下,就算退休年紀推遲,仲有冇方法快少少可以移民寶島咁呢可?

No comments:

Post a Comment